呢一日，約左阿 Paul 同『懷疑』佢既另一半 Rita (Shop Manager) 一齊食晚飯。本來仲有 TT 都黎，但係佢要陪男朋友就唔黎，搞到我變左電燈胆咁。


食食下飯，講番以前公司度（而家要改口叫“以前”喇，唉﹗），聽 Rita 講，我走左之後到而家，頂我個位0個個仲未返工，加上細佬個位一直懸空，所以以前老細要自己分開三份：一份要做番公司既大客、一小份要負責做學校既報價單、仲有一大份要做埋訂貨啦，Check 代理有冇貨啦，返左黎既貨要分貨啦，仲要點埋倉。我地三個都好合拍話：『抵死﹗』哈哈哈﹗佢仲話而家上面寫字樓冇一個得閒，個個張枱亂過亂葬崗咁，係得師奶仔同 CP 仔佢地見到張枱喎。（唔﹖﹖CP 仔﹗﹗）成個醒一醒添﹗咁 CP 仔而家點呢﹖



我唔知道，因為我用一個好婉轉既問題問佢地：『咁大家都好嗎﹖』係咪問左等於冇問呢﹖所以佢地都講左個答左等於冇答既回覆：『幾好呀﹗』廢話﹗﹗


之後講下近況呀，食下龍蝦呀，問我搵咩工呀咁。講開搵工，Rita 講左一樣關於 CP 仔既野俾我聽：原來我出事之前，CP 仔有問過 Rita，我係咪出面已經搵到第二份工，所以0個排做到好似博炒咁樣，Rita 梗係話俾佢聽唔係啦。我就同佢地講番唔係囉，但係點解佢唔直接問我，要靠其他人打聽我既野喎，Rita 都話唔知點解。


｛係度講番 CP 仔同 Rita 既關係先：佢兩個0係以前舊公司（2C，0係香港賣 Software 最大0個間）已經係一齊做 Sales，跟住 CP 仔轉左對頭公司（Encore，0係香港賣 Software 第二最大0個間）做，之後 CP 仔介紹 Rita 入黎 Encore 做，有時佢地會約埋 2C 既同事一齊食飯。雖然佢地都幾 Friend，但係聽 Rita 同 CP 仔講野既語氣，就知道佢地只係同事關係。｝


之後又知道細佬少少近況（你地仲記唔記得佢呀﹖… zzz）。阿 Paul 仲有同細佬聯絡，原來佢仲未搵到工，因為佢呢排好執著要做 Designer，但係佢自己又未讀完個 Certificate，鬼請佢咩，所以佢都同 Paul 講，搵埋呢個月都搵唔到既話就做番 Officer 喇，佢附近有相熟既公司請人喎。咁都好，細佬都算叫做穩定左喇，我都要努力至得。


同佢地 Bye Bye 之後，唔經唔覺距離我要表白既日子仲有兩日（打呢篇0個陣已經過左喇﹗運吉﹗）因為有一 D 人為因素，所以……12個鐘頭之後話俾大家知啦，請大家賜我力量，我都要祈下禱至得﹗……zzzzzz