Intern終於係今日正式完結，回顧成個Intern，覺得都算冇白過到，俾我學到好多野。最正係有得俾我創作同設計下d野，呢樣都可算係拜我好彩地被派去禁毒處所賜。而今日我都好圓滿地將手頭上既工作完成晒，唔會覺得爭咁d野就走左去。

唉，完左啦，明明係期待左好耐，但又因為已經習慣左而有d失落，尤其係一班非常nice既同事，話就話可以keep contact、得閒返去探下佢地之類，但其實大家心裡都知係冇乜可能，只可以留係回憶裡面。我最唔鍾意既就係面對d咁既時刻，就好似去親旅行時一樣，返返香港後大家都唔會再聯絡。

不過呢個last day卻十分黑仔，原本諗住著埋最後一次就可以功成身退既皮鞋，唔知係咪感應到我要丟佢，早上一落車行左幾步已經甩左個鞋踭，搞到我拖住拖住咁返到office，幾經辛苦班到支萬能膠黐返，點知食完lunch返黎又再次甩返。今次我狂劑萬能膠，終於冇再甩。

到左夜晚，先係最不爽既，搭巴士返屋企訓過左籠，竟然到左總站，係有史以黎第一次，最衰既係已經成兩點，終於焗住晒左12.5搭的返自己條邨，覺得非常白痴。

我既last day就係咁結束，不過仲期待下星期四同事搞既farewell lunch，聽佢地講某d野食要book定先有，好似好正喎。講真，都仲未試勻晒想去既食肆，兩個月裡面試過唔少野，有好有唔好，好既有蘭芳園既撈丁同奶茶冰冰、四十蚊既燒味飯；唔好既有今日試左既肥到反胃「招牌」東坡肉麵、拍得住學校carteeen既堂堂政府總部飯堂，希望黎緊係中環既最後一餐唔會失望啦。