上星期減持紐元@HK$6.209之後，今個星期維持HK$6.1附近。
本來我曾經打算HK$6以下吸納返少少，但我硬係覺得美息有反彈向上加o既風險；
商品價格急回，金價下破US$860，米價又回軟，油價又回軟，橙汁期貨下瀉：
除非商品回勇，否則觀望而唔買唔賣，應該會係上策。

恆指上破26,000，距離我o既5月底6月頭目標27,500越o黎越近。
未來呢一個星期，應該會回破26,000以下試一試支持，然後先至慢慢再升過。
我仍然對6月到27,500充滿十足o既信心，亦會o係見到呢o的位附近清貨，改方向留意Put輪。
6月恆指有可能上破28,000，甚至到達28,800；
不過，要冷靜唔受市場影響而識得落車，我覺得27,500已經為我帶o黎唔錯o既回報，又可以留返o的水位俾下一個去博。

雖然依家港元利息非常低，但我覺得唔代表要過份投資去博回報：
1. 高息背後，可能會因為投資失利，多多息都保唔返；
2. 好似5匯豐呢o的過往股價表現好，息率高o既股票，根本基本因素已經變差。主席不善處理危機，美國業務呢個黑洞已經無得醫，我覺得下次下跌，有機會下試HK$70；
3. 新興市場、商品市場好易受市場情緒影響急升狂跌，有機會浪頂入而好耐先至返身；
4. 歷史上永遠無長升長有o既投資，所以投資人民幣唔代表必勝！（不過好在，人民幣對歐羅澳元過去1年都係跌~）

就算幾低息，利息都係保本情況下o既回報~