12:50起身，但已經得我一個o係屋企。
13:10起程返城大。
Lunch:城大飯堂沙爹牛肉飯，HK$10

14:00去CSC出面開MKT4625大會，但近兩個鐘o既大會都只能完成分工，好難做……
之後去CSC搵周生，傾o左兩個半鐘；中途打o左兩個鐘Winning，表現多次「撞內柱彈出」俾佢睇……
18:30就搭火車返尖沙咀，o係尖東阿波羅買o左4盒1公升鈣思寶@HK$5.9，証明我廿幾歲仲未戒奶……

Dinner:麥當當魚柳包+中薯條+中Coke Light+菠蘿新地，HK$20.8
聽日同星期三，魚柳包買一送一；星期二同四就麥樂雞買一送一。唔知會唔會好似舊年四月第一次魚柳包買一送一時一樣熱賣，攪到部份麥當當17:30已經缺貨~

尖沙咀百樂酒店間皇后餅店裝修o左成個月都未開……回想起當年小學o係廣官放學後，就好想媽媽帶我同家姐行彌敦道，因為可以行過皇后餅店食即制香噴噴豆沙包~可惜記憶中生存唔夠一年就結業。
雖然今時今日已經唔會即制，但起碼突然想食都有得回味。

都已經經歷o左一段漫長o既單身日子。Ammm......直至依家，心情都還可以，不過少不免會成日無喇喇情緒大上大落。可能因為無人聽我呻，又可能因為無人陪我。
有時都會覺得好無助，不過又覺得係自己做成呢個進退失據o既局面。想將o的時間放多o的o係事業同股票，但就會令我出現賭性，好危險。
想同自己鍾意o既人成家立室，有小朋友。雖然會辛苦養家，但會好開心。希望到時可以做家庭經濟之柱，令太太可以自己決定返唔返工。弄兒為樂可能已經係幾老土o既思想，但我係好忠於呢個意念。我會覺得一個家庭，一家幾口開開心心去玩，去面對問題，去創造新天地，去創出新經歷，係人生一大樂事~
但，又有邊個會Match到我？