我曾經拍過兩次拖,好多朋友都認為我係拍過好多次拖!!
初戀男朋友係朋友個朋友,佢屋企幾有錢,小康之家,佢又真係幾錫我架,唔係話就晒我,我有錯,佢真係鬧死我架,佢都教識我唔少野,係玩音樂架,佢講左好多佢既野比我知,佢拍左咁多次拖,都仲係青頭仔,我都相信佢係好人一個!但係我地好少出街,因為佢番工,我就放假,我番學,佢就放假,真係好難先就到!!
最後係因為我情緒上有問題而分手,簡單D講就係無理由地分手!!

第二任男友就係高楊,好多知都知!
佢係我中四中五既同學,又係電腦組同學,平時無咩兩句。
有一次,阿妹-思敏上英文同佢朋友傾計,最後就比阿SIR調左去我後面,咁我會同佢傾計,咁就開始同高楊傾計,我果陣都係當佢係我朋友咁樣,後來因為我要攪班網,就有佢ICQ,大家就用ICQ傾,佢話唔係好慣用ICQ,咁我就佢啦用YAHOO MESSAGE,無咩所謂,我又大把朋友用!
班上最好朋友果位女仔就同我講,"我覺得高楊好似鐘意我地班某一個女仔",我同佢好奇心就問佢啦,我最後就用一招"如果你唔講,我唔同你玩YAHOO MESSAGE,連個YAHOO MESSAGE都刪埋佢",就係呢一句,佢就講左"係你",我即時啞左同OFFLINE,我果位朋友當然都知道,啞左!
第二日我都無同佢講野,都好避佢,佢知道都知我避緊佢,佢都識做,之後番到屋企,其實我又無咩所謂咪同佢一齊,但係呢件事令我好後悔!
因為對住呢個人太悶啦,平時打電話比我,可以有唔出聲多於半個鐘既事,我最怕,所以我係會用屋企電話同佢傾,另一面同其他朋友傾電話,當然啦,高楊係唔知我手提有人,大家要明白,真係好悶!
仲有呀,你同佢講野,完全係估到D答案,比既反應,永遠都係比我估到!
仲有呀,永遠都係著成一套衫,出街都係覺得幾失禮!
仲有呀,所以野都就晒我,意思係所有野都唔洗玩!
仲有呀,未試過兩個人出街!
我最後都係頂唔順,岩岩三個月,咁就散左,
但係散左之後,我無喊過,好叻女呀!
本身係話佢阿媽想佢專注學業,我就打蛇除棍上,散啦!理由就係佢媽媽想佢專心,哈哈,有D賤,其實到今日佢都唔知點解!
散左一排都仲可以做到朋友,但係我覺得佢好似仲比以前仲要關心,仲要管,我覺得朋友係唔應該管我咁多野,我意思係佢仲想同我一齊,咁我最後決定唔同佢講野係一個最好既方法!!

第三任男朋友係賢少!
同大家講下我地相識經過,中三,佢同我既朋友玩,我就知道呢個人。
中四我地就同班,大家都係住係翠林,有陣時都係一齊番屋企玩。
中四讀左一半佢就走左,我就升左上中五,我地都有保持聯絡,佢成日都有搵我傾電話,大家就熟左。
大家都有保持傾電話。
11月24號,我,賢少,ELSA,同ELSA朋友-螢去左尖咀,之後我同賢少就坐巴士番屋企,佢坐巴士訓交,訓左落我度,果一刻我都知會出事架啦,點知番到屋企就同我講,咁其實我都想架,因為我太悶啦,多個人錫自己唔好咩,最後都係受左。

對住呢個男朋友,我唔會諗其他人,連其他男仔打電話比我,我都唔想去聽,我等賢少電話,可能等完之後係唔打離,但係我都希望等!!
仲有,對住第二任男友我會考慮一拖幾,但係對住佢就無囉,真係想專心一意對佢,可能只係得幾個月,點都好啦!!
浪女唔一定會花心架!

我係知道賢少唔少以前既野,但係我都唔會理,因為呢D野係人地講,我唔會信,就算真係,都唔關我事,因為呢D野人夾人,我唔會理咁多!!