我快要轉posting啦! 我一直以為今個星期五係last day，後來我才發覺我誤會左，原來係星期五就已經要去新的工作崗位，但我到呢一刻都仲未知會去邊度返工。忽然早左一日走，我清手頭上工作的schedule亂晒。

呢個禮拜有好多午飯飯局，原因係我老闆都係做埋今個禮拜就轉posting，佢請我地食飯，我地又請番佢食飯。而我亦因此第一次同成班同事食lunch。昨日SEO請我食飯，只有我地兩個人，我曾經擔心大家冇話題，但後來諗諗下，佢咁大個人，應該識吹水啦，所以我冇特別搵話題，成餐飯由得佢搵話題算數。我地去食泰國菜，order兩個炒飯/炒河+兩個小食，食唔晒，不過d food幾好味。今日老闆請成班同事食飯，我仲以為成個office 60人都去，我仲諗緊個場面應該幾熱鬧。原來老闆淨係請admin同事，可能大家關係密切d啦! 今日老闆的老闆 CEO (Chief Executive Officer)都出席，老闆仲向CEO誇口讚我做得野，比我的上手更好。老闆，咁大頂帽我戴唔落呀!

幾個月就轉一次posting，你地覺得係好處定壞處呢? 我就覺得幾好喇! 趁我仲後生，可以不斷explore不同的範疇; 亦因為我後生，好多野都可以好快上手，一個posting做得太耐就會覺得悶; 而我不斷嘗試做唔同類型的EO工作，對我將來見政府CS工都有好處; 最緊要係，個老闆or上司對你唔好，你都唔駛對佢好耐。唯一的壞處就係唔穩定，剛settle down，又要走喇! 新入職EO是2-3年轉一次posting的，當你年紀大，就會4-5年先轉一次，滿足一班唔想轉換工作環境的老一輩。