２００８年７月１２日，一聲”嫁給俾我啦”　就展開左我地攪婚禮既序幕．．．



０８年整個暑假忙於搵地方訂酒席，搵婚紗攝影．

首先，當然係定我地既大日子啦，　其實都冇乜點唸，　只係基於幾個原則為大前題：
１，一定要嚮冬天〔事關我愛人太怕熱喇，我怕佢熱到唔要我咁點算，哈〕
２，唔可以嚮１月〔我ｄ乖乖學生要考試嘛，我實在太想佢地黎觀禮喇．．〕
３，因為我信天主，所以邊日都係好日
就係咁，結果我地就定左嚮２０１０年２月７日（星期日）結婚喇～
　
之後我地就著手搵擺酒地方，大大話話我地都搵左廿，三十間酒樓，　包括美心，鴻星，好彩集團等，其實有好多間我地都好鐘意，　不過唔係擺唔到２２圍以上，　就係個新娘房太細．．　結果去左灣仔皇潮匯酒樓舉行我地既婚宴．　雖然唔係好豪華，　不過勝不在地方夠大，而且唔係太貴，而且佢既餸都唔係網上講到咁差，於是就決定左～

之後大約嚮９月，　我地去左九展睇台灣既婚攝展，　我一向鐘意大自然既景色，　所以對台灣婚攝展有一定既興趣．　有好多朋友問我點解唔嚮番香港影呀？　香港都有架喎．．　冇錯，　香港確實都有海灘，海景，湖景等，　但係香港價錢較貴，　而且香港既空氣污染指數甚高呀～～　結果就決定去台灣～　搵左〔最佳風情〕呢間公司．

記得個日，最佳風情既楊經理親自為我地度身訂造左個ｐｌａｎ俾我地，價錢實在太抵，加上我地自己有ａｓｉａ　ｍｉｌｅｓ換機票，　嘩，比香港平成倍！　咁抵，我地當然ｊｏｉｎ左啦～　就係咁，　我地就等待０９年３月尾去影相喇～～～

１０月－１１月，殿下家裡發生左ｄ問題，令我地２個有ｄ不知如何是好．．　真係好唔開心，又擔心喎．．　好彩，託天主既福，我地都叫做搵到出路，雖然有ｄ辛苦，不過我知道只要大家互相信任，互相幫助，一定可以解決呢個眼前既問題！　結果，０９年頭尚算穩定落黎喇～

１２月－０９年１月，除左花好多心機去佈置聖誕之外，　其餘大部份既時間都係整花球～　哈，嚮呢段期間ｓｅａｒｃｈ左好多有關花球既資料，於是決定為自己整番個用黎影相～　去各好多間花店，大多嚮旺角，太子等地方，　例如花墟等．．　買左一大堆絲花材料番黎，〔包括：大白牡丹，黃鬱金香，粉繡球，同埋ｄ襯花等，都係幾百蚊，開頭半個月睇書學整ｄ花仔，用鐵線，顏色膠紙包住花托等步驟，　學完之後就開始砌個花球，嘩，　都攪左成個月呀．．　不過整好之後又幾靚喎，衰鬼～　〔遲ｄ　ｕｐｌｏａｄ相呀〕


＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

就係咁就過左半年喇～

期間，我仍然繼續教笛，跳舞，學笛，上慕道班〔呢個比我想像中開心同好玩～〕，練考試歌，連續性既準備婚禮既資料搜集．．．

雖然真係好攰，有時真係會發脾氣架，不過唸到將來會有個美好既回憶，我就會平靜過黎繼續搵資料～　我知道自己既婚禮並唔能夠做到好豪華，不過只係知道，如果我地能夠令當晚既親朋好友都同我地一齊高高興興，食呢餐係我地人生當中好重要既一餐飯，我地就心滿意足～