17/2 好開心﹗Helen今日整左朱古力畀我地食， 哈~~~~估唔到佢真係整架喎，尋日仲以為佢講下tim，佢整左白朱古力同黑朱古力，我都係覺得白朱古力比較好食，因為黑朱古力好苦呀﹗但係個個人話黑好味，白朱古力太甜啦...搞到好似我好有問題咁，但係我明架，自己鍾意就得，人地還人地，我還我，如果迫我食黑朱古力既話，我食都食得唔開心﹗

我都有部整朱古力機架，但係拆都未拆過，連裡面有咩野都唔知，都唔知擺係屋企做咩野。唔~~~~等我真係好好好得閒0個閒可能會玩下既，但係呢排實在太忙啦﹗

今晚無端端要上堂，無得陪屋企人食飯。呢排有好多野搞，其實自己都盡量分配時間架啦，希望家庭、學業、事業都可以兼顧到啦，路係自己揀既，幾辛苦都好，我都唔會怨任何人架﹗

嘩~~~見到隻好似獅子既狗，好大隻，超驚囉﹗咁大個女都未見過一隻咁既怪物架，仲要畀人嚇...

18/2
今日返9:30am-6:30pm，最唔鍾意星期五，返成日。今日上lab，我地個組好快做完，諗住走人啦，點知棉仔(阿sir)唔畀我地走喎，搞錯呀﹗難得我地有一次咁快做晒喎，平時我地落堂都未做完架嘛...哈~~但係最終棉仔都放過左我地。

之後就慘啦﹗因為我地早左一個鐘走人，所以變相有5個鐘天地堂，去左computer room到搞掂Helen份功課先，之後我地去圖書館傾project，嘩~~~勁眼訓呀﹗提唔起精神聽佢地講野呀，之後仲訓埋tim，原來圖書館都幾好訓架喎。真係好對我既組員唔住呀，佢地去搵書而我就係度訓覺，驚嚇呀﹗訓醒見到Helen拎住成疊書呀，仲要成疊借晒喎，想睇盲我咩!?

yuen sir好好人呀，派金莎喎﹗呢d野只會係小學、中學教師至會做架嘛，仲話女仔至鍾意金莎架啦，睇黎佢追女仔都有一手架喎，咁有研究既﹗