相思歌1 懶雲

　
前日公園會著君，

怎會即溫存？

害阮心頭拿不定，

歸日亂紛紛。

飯也懶食茶懶吞，

睏也未安穩，

怎會這樣想不伸，

敢是為思君。

批（信）來批去討厭恨、

夢是無準信，

既然兩心相意愛，

那怕人議論？

幾回訂約在公園，

時間攏無準，

相思樹下獨自坐，

等到日黃昏。

黃昏等到七星出，

終無看見君，

風冷露涼艱苦忍，

堅心來去睏。


原載於「台灣新民報」三九六號

一九三二年一月一日





相思歌2


阮是兩人相意愛，

若無說出恁不知？

阮著當頭白日來出入，

共恁外人無治代？

恁偏愛講人歹話，

使阮驚心不敢來。

娘子疑我合伊歹，

冥日相思真利害！

頭上貼著鬢邊膏，

身軀消瘦可憐代。

伊正洗衫我返來，

心頭歡喜撲撲猜。

只為身邊人眾眾，

不敢講話真無采。

恨無鳥仔雙箇翼，

隨便飛入伊房內。


原載於「台灣新民報」三九六號
一九三二年一月一日