本來想早d打返日記 但係太累 所以到今日先打..
變成回憶了.. 無錯 所有都變成回憶啦..
其實講真呀 結婚前一天 結婚當日 很多東西 都像很模糊..
可能真的太累吧..
當曬了相出來 記憶才可以有返..

結婚前一晚..
有兩個陪嫁姊妹 雪雪 同軒軒 陪著我出嫁..
當晚 我仲有好多嘢未買...雪雪陪我買晒d嘢 好忙..
人地話 結婚前一晚 雙方都唔可以見面 但係我地就不停打電話俾對方
因為 好多嘢驚無整 問吓對方整咗未 又check下仲有d咩未做..
下午時見到之前訂好咗個花球..
又唔係好鍾意 又失望...不過 都無得say no
朋友叫我當這個就是最好最好的花球吧 這樣想 會開心d..
幾經辛苦 買晒嘢啦...回到家 急急腳去沖涼..
換上 粉紅色睡衣..等待上頭的來臨.
上頭時間是男家的半小時後...
等波仔電話 等得好心急 我之前提議 佢上完頭後 send sms話我知..
雪雪話我地好先進..^.^
最後 我都係忍不住打俾佢...終於有上頭時間了..
時間是10點25分..
我放好晒上頭用品 枱前放了三碗湯圓 仲有
呀妹同雪雪趕得切買回來的蛋糕同提子
媽媽在姑姐指度下 拿起梳 徐徐的說 "一梳梳到尾 二梳白髮齊眉 三梳兒孫滿地"
及在頭上夾上紅繩 齊齊食湯圓時間..
三碗都有九粒 大大粒的湯圓 寓意長長久久..

當晚 軒軒十一時半到 十一時 好友埼奇拿了東西來..十一時十五分..
波仔的兄弟上來攞東西 我要躲起來 不讓他們見到..
雪雪同妹妹就在門外接應..
執埋東西到休息時間 已是凌晨兩時了..
我在廳中 開了梳化床 我 雪雪 軒軒 三個人一起睡..
很迫 但係好warm啊...我地三個仲做埋eye mask... 好搞笑..
很快 她們已經睡了..但我仍然睡不著...看著鐘三點 三點三....
其實我四點就要準備起床 等化妝師 上來化妝..
起身時間是三點四十分...實在睡不著啊...

待續......