⊕做工　　⊕螺絲釘　　⊕做工難出頭　　⊕埋沒人才　　⊕無頭殼的工人
⊕工人與藝術家　　■台語註解

　　◎做工感言

　　　　　　　　　　　　　　⊕潘文良

　　阿文也呣知有幾年，無做工嘍！（做逐工上班，趁錢的工。）
　　三個月前（八月），佫佮朋友去做工，是「做園藝的」——
做園藝的，植樹種花，聽起來，親像真高尚（真有涵養），
其實嘛是賣氣力、流汗做苦工。
　　透早五點外起床，六點半、七點出門……轉來到茨，著暗時六、七點。
　　食飽飯，洗好身軀；開電腦，想要做家己的工課（整修《康熙字典》），
卻是起愛睏，目睭直直瞌去，倒落眠床，一睏著到半暝，乃至到天光。
　　做工的日子，逐工都足悿，人𤺪𤺪、頭昏昏、腦頓頓……
　　年紀也有啦！勞力，著難以再勞心。
　　阿文自來省食儉用，無食薰、無啉酒、無博檄；
無轎車、無機車、無手機仔、無娒無囝、無貨款……
所以也無啥負擔，實在呣免，做𠇺赫恁辛苦！
於是，做𠇺十月底，著決定無愛佫繼續做落去，𢓶好專心做家己愛做的載誌。
　　呰段做工的日子，有所見聞，也有所感想，所以，寫了幾篇仔《做工感言》，
舖於「臉書」。
　　今仔日有閑，想想咧，重新整修，重新發表於「新聞台」，佮逐家分享。
　
　　文章內容，主要是以「台語」寫的，真濟台語的字詞，也盡量加以註解。
　　朋友若無興趣，跳過、讓過著好；若有興趣，著加減看、加減研究，總是有好無䆀。
　　　　　　　　　　　　　　　　　　　　　2017.11.01.三　19:30:00
　

　　⊕做工

　　做工＝賣時間＋賣氣力（賣頭腦）＋賣精神＝賣性命
　　做工𣍐出頭！
　　工若出頭，著變土——
　　有的變土豪、有的變土匪、有的變土人。
　　　　　　　　　　　　　　　　　　　　2017.09.29.五　03:15:00
　
　　註：賣頭腦者，如從事廣告業者，每工腦力激盪，激𠇺頭殼強要壞去。
　
※本文發表於「臺語學院」。2017.09.29.五　03:18:00
　https://www.facebook.com/groups/978821105480673/permalink/1856320974397344/
　

　　⊕螺絲釘

˙每一個工人，著親像一部機器面頂的螺絲釘相款——
　每一支螺絲釘，攏真重要——
　只是‥螺絲釘，隨時攏會當替換掉。
˙頭家倩工仔，呣管啥人攏好，只要䯇仂著好——
　𪝋貧憚的，著叫伊明仔早起呣免來。
˙頭家的夢想‥
　上好是有機器人來做工——
　機器人，會當一工做廿四點鐘，免休睏、免食飯、免啉水、免放尿……
　佫𣍐哀悿、𣍐叫苦、𣍐怨尤、𣍐抗議。
　　　　　　　　　　　　　　　　　　　　2017.10.03.二　19:54:00
　
※本文發表於「臺語學院」。2017.10.03.二　19:54:00
　https://www.facebook.com/groups/978821105480673/permalink/1860690290627079/
　

　　⊕做工難出頭

˙即馬一括頭家，攏愛倩「派遣工」，愛幾個，著有幾個，
　也免負擔，員工（在職）的勞健保……
˙工仔人（派遣工），為著要赴八點，到工地去上班，
　路途若較遠，往往攏愛六點半，乃至六點，著位人力公司出發——
　個人則早起五點半，乃至五點，著愛起床；
　做𠇺下晡五點下班，塞一下仔車，轉到茨，往往攏七點外。
˙做工，付出時間、氣力、汗水，逐工著誠悿，
　轉到茨，洗身軀，食飯飽，坐咧膨椅，想講看一下仔電視，結果煞睏去。
　好無容易，禮拜會當休睏，有的是睏到日頭晝，也抑未起床。
˙如是一日又一日，一禮拜佫一禮拜，一個月復一個月……
　做工，做𠇺麻痹麻痹——
　想要看書、學習啥麼……睏都無夠，佫有啥心情？
˙如是工仔人，著親像陷咧漩渦內底，難以出脫，至死方休……
˙做工，總是為著生活、為著三頓、為著娒囝、為著房屋貸款……
　為著啥種種原因，不得不做工。
˙俗語講‥「大富由天、小富由儉。」
　有的做工仔人，𣍐曉儉，尤其是羅漢骹仔，往往「䯇仂趁，拍拚開」，
　結果是「趁累累，食累累——盡趁盡開」。
˙有的工仔人，不離煙、酒、檳榔，加上飲料、早頓、中晝頓，
　一工所費，開著四、五百箍——
　若較慷慨一下，麥仔酒，歸箱買來逐家啉，
　一工工錢，則千三箍，結果伊開千六箍……
˙有的工仔，愛博徼，領薪水，隔轉工，著無看人，
　無三工，薪水輸了了，只好轉來，繼續做工。
˙有的工仔，興查娒，「食飯配菜脯，趁錢開查娒」；
　休睏日，著去酒店，做「火山孝子」……
　無細膩，一點仔存款，著予查娒，騙騙拐拐去，
　只好繼續，拍拚做工。
˙有的工仔，呣知咧變啥，變𠇺無錢𢓶食飯，逐工死皮賴面，四界給人借錢，
　領薪水，還人錢，都無夠，如此舉債度日，難得翻身時！
˙華諺道‥「吃不窮、穿不窮——不會打算一世窮。」
　做工仔人，實在愛謹記在心！
　　　　　　　　　　　　　　　　　　　　2017.10.05.四　20:11:00
　
※本文發表於「臺語學院」。2017.10.05.四　20:11:00
　https://www.facebook.com/groups/978821105480673/permalink/1862793237083451/
　
　

　　⊕埋沒人才

˙每一個人，攏有伊的興趣佮專長。
　有真濟做工仔人，若用著所在，其實攏是人才。
　只是‥頭家今日，只要「賣氣力」的工仔，比如‥挖土、搬石材。
　呣管來的是啥人，任務著是‥挖土、搬石材——
　工課進度，做會好，上重要。
˙頭家人，著愛會曉看人、會曉用人——
　比如‥教猴仔爬樹，挽水果、挽椰子，便是適才而用；
　啊若是叫狗仔，著愛爬起去樹尾頂，便是強其所難；
　予狗仔做保全，守衛、巡邏，則是狗仔，會當勝任的載誌。
˙工仔人，為著要趁錢，只要有穡頭𢓶做著好——
　呣管是呣是有興趣、是呣是伊的專長。
　看在「錢的面子上」，佫較艱苦、粗重的工課，嘛是照做。
　長期落來，著算講是一個人才，也會被頭家（被家己）所埋沒。
˙有真濟做工仔人，其實是懷才不遇——良馬未遇伯樂。
　頭家𣍐曉識才、愛才、惜才——千里馬，關咧水牛椆。
　也因為家己，長期做工，慣性麻痹而失志，
　蹧蹋家己，無機會，發揮專長，而難以出頭天。
˙人各有心、心各有志，各有興趣、各有才能！
　一個人——
　將家己，囥佇無適當的所在，是咧蹧蹋家己；
　被別人，囥佇無適當的所在，是咧被人蹧蹋。
　將別人，囥佇無適當的所在，是咧蹧蹋別人。
　　　　　　　　　　　　　　　　　　　　2017.10.07.六　20:21:00
　
※本文發表於「臺語學院」。2017.10.07.六　20:21:00
　https://www.facebook.com/groups/978821105480673/permalink/1864787523550689/
　
　

　　⊕無頭殼的工人

˙有人講‥
　「做工仔，戇戇啊做著好！
　　頭家交待啥，著做啥；無交待，著呣好做。
　　頭家講安怎做，著安怎做，呣𢓶家己，大主大意。」
　大概驚做𪝋濟，會去予頭家偏去——加做也無加錢。
　俗語講‥「有功無賞，拍破著賠。」
　所以‥「多做多錯、少做少錯；有做有錯、無做無錯。」
　做工仔人，著若阿兵哥共款‥服從命令是天職！
※或問‥「頭家若叫你食屎啉尿，你要食要啉否？」
　笑答‥「若予我一萬箍，食一抔屎、啉一泡尿，我則考慮看𥌚。」
˙做工仔做久，往往攏會慣性麻痹，
　變𠇺親像機器人𫝛款‥一個口令，一個動作。
　工頭叫伊挖土，伊著挖土；叫伊搬石頭，伊著搬石頭。
　有的工仔，叫伊掃塗骹，若無講‥掃塗骹了後，要創啥，
　伊掃完塗骹，著坐咧𨑜休睏。
　工頭來，問講‥「你塗骹掃好，也𣍐曉去𩰒挖塗？」
　伊應講‥「你拄仔也無講，我哪會知，續落去，要創啥？
˙阿文有話講‥「動動腦，萬事好；不動腦，費手腳。」
　挖塗、搬石頭，嘛會當想講‥安怎挖、安怎搬，則會較輕鬆、較有效率。
　做工仔人，呣用頭腦，經年累月，頭殼著生銑、腦筋著相佩；
　做載誌，若是𣍐曉變巧，永遠都是咧做戇工、做死工。
˙做載誌，嘛愛會曉分「輕重緩急」‥重要的（主要的）、次要的、無重要的。
　比如‥頭家叫你去種樹仔、植栽的所在刜草。
　主要著是‥樹骹、花欉骹，愛除草、鬆土、沃水、施肥。
　一工的時間，總是有限，遮個主要的工課，若攏做煞，
　抑有時間，則去刜邊坡、崁骹、水溝仔的雜草——因為遮個是次要、無重要的。
　有時間著刜，無時間，｛勿愛）刜嘛無要緊。
　呣𢓶顛倒頭做，該做的，無做好；免做的，做了了——
　若按呢，頭家是𣍐阿咾，顛倒會去仾唸。
　　　　　　　　　　　　　　　　　　　　2017.10.14.六　08:02:00
　
　
※本文發表於「臺語學院」。2017.10.14.六　08:02:00
　https://www.facebook.com/groups/978821105480673/permalink/1871257329570375/
　

　　⊕工人與藝術家

˙做工的人，通常是為著生活，則著出門討趁——
　無做著無錢、有做則有錢，所以‥有錢則要做，無錢無愛做。
　所做的工課，通常也呣是伊的興趣，乃至呣是伊的專長，做著是誠無奈；
　講實在，著是‥愛錢爾，無愛做——看在錢的面子上，只好去做。
．藝術家，是為著興趣、為著理想、為著發揮才能——
　無錢趁、趁無錢，伊也是照做；即使廢寢忘食，也是在所不辭！
˙工仔人，製作商品。
　藝術家，創作藝品。
．製陶師傅，一日做千百塊碗盤，也只是商品，價值無偌濟。
　陶藝師，一個月，做一支花矸，卻是藝術品，價值不菲。
˙一間大樓的完成，需要千千萬萬人次的工人。
　但是，大樓外牆，只會標示建設公司、設計師的名，而無𠇺一個工仔的名。
　工仔人，只要「按圖施工」著好——呣免動頭腦去設計。
　乃至‥「順主人意，著是好師傅。」人安怎講，著安怎做。
　工仔人，只是完成作品的「工具」而已！
　工仔人，也因為付出真濟汗水、勞力，但結果（成就），卻是別人的，
　所以‥真正會當做是家己的穡頭，盡心盡力去做的，也無幾個——
　會當摸，著盡量摸，輕鬆仔做著好；
　本來一工會好，著𠇺拖兩工，按爾則有工好做、有錢好趁。
．藝術家，完成作品，成就是家己的；
　是照家己的想法去做，要安怎做，著安怎做。
　所以‥盡心盡力，雖然艱難勞苦，也無怨無尤！
˙俗語講‥「做木匠，無眠床。做木匠，睏椅條。」
　因為‥逐工做穡，做𠇺足悿，轉到茨，著懶啦！
　眠床壞去，也貧惰修理，
　只好兩隻椅條排咧，面頂舖枋仔，當做眠床，會當睏著好。
．水電師傅，茨內的電火歹去，歸禮拜，抑未修理。
　太太講‥「家己做水電，也呣修理！」
　先生講‥「逐工轉來，都誠晏啦！佫有夠悿，無想要振動。」
　太太講‥「別人兜，電火歹去，叫你去修理，你著去修理……」
　先生講‥「修理別人的，有錢趁；修理家己的，無錢趁……」
　太太笑講‥「啊無是愛偌濟？我則付予你！拜託你緊修理！」
　先生講‥「好啦！好啦！我來修理！」
．先生問太太講‥「妳佇餐廳，逐工洗碗盤，茨內的碗盤，哪會攏叫我洗？」
　太太應講‥
「餐廳洗碗盤，是為著趁錢；你若予我工錢，我著幫你洗！
　若無咧！我煮飯炒菜，你分擔洗碗盤，這是該然！」
˙成語「庖丁解牛、游刃有餘」‥
　庖丁，是指梁惠王時，一個善於刣牛的廚師，技術極為熟練、巧妙。
　《莊子．養生主》‥
　庖丁為文惠君，解牛時，奏刀騞然，莫不中音。
　文惠君，讚嘆其技藝巧妙。
　庖丁釋刀，對曰‥
「臣之所好者，道也，進乎技矣！
　始臣之解牛之時，所見無非全牛者；三年之後，未嘗見全牛也！
　而今宰牛時，全以神運，刀入牛身，若無厚入有間，而游刃有餘。
　因此，牛刀雖已用十九年，而其鋒利，仍若新發於硎。」
˙做工仔人，若是會當改變心態、加用頭腦，其實‥
　做工做久，經驗豐富，老練熟手，駕輕就熟；
　熟能致巧，巧能致變，變能致奇，奇能致妙——
　著會當進升，另外一個境界，比如「禪、道」的境界，而成為達人。
　如是「精於工、遊於藝」，便是個人的造詣與成就。
　　　　　　　　　　　　　　　　　　　　2017.10.31.二　23:30:56
　
■延伸閱讀
　　《莊子．養生主》：
˙吾生也有涯，而知也無涯。
　以有涯隨無涯，殆已！已而為知者，殆而已矣！
　為善無近名、為惡無近硎。
　緣督以為經，可以保身、可以全生、可以養親、可以盡年。
˙庖丁為文惠君解牛，手之所觸、肩之所倚、足之所履、膝之所踦，
　砉然嚮然，奏刀騞然，莫不中音‥合於《桑林》之舞，乃中《經首》之會。
．文惠君曰：「嘻！善哉！技蓋至此乎？」
．庖丁釋刀，對曰：
「臣之所好者，道也，進乎技矣！
　始臣之解牛之時，所見無非全牛者；三年之後，未嘗見全牛也！
　方今之時，臣以神遇，而不以目視；官知止，而神欲行。
　依乎天理，批大郤、導大窾，因其固然。
　技經肯綮之未嘗，而況大軱乎？
　 良庖歲更刀，割也；族庖月更刀，折也。
　今臣之刀，十九年矣，所解數千牛矣，而刀刃若新發於硎。
　彼節者有閒，而刀刃者無厚，以無厚入有閒，
　恢恢乎！其於遊刃，必有餘地矣！
　是以，十九年，而刀刃若新發於硎。
　雖然，每至於族，吾見其難為，怵然為戒，視為止，行為遲；
　動刀甚微，謋然已解，如土委地。
　提刀而立，為之四顧，為之躊躇滿志，善刀而藏之。」
　 文惠君曰：「善哉！吾聞庖丁之言，得養生焉！」
　
◎維基百科。庖丁解牛
　https://zh.wikipedia.org/wiki/庖丁解牛
　
▲
~~~~~~~~~~~~~~~~~~~~~~~~~~~~~~
■台語註解（注音、拼音，皆標變調，較偏泉州腔變調。）
【䯇仂】　ㄍㄨㆵ’　ㄌㄚㆵ’　kut8 lat8　努力勤奮貌。
【貧惰】ㄅㄧㄣ├　ㄉㄨㆩ├　pin7 tuann7　懶惰。或作貧憚。
【一括】ㄐㄧㆵ　ㄍㄨㄚˋ　tsit4 kua2　一群、一票。（括‥包括。）
【膨椅】ㄆㄨㄥˋ　ㄧˋ　phong2 i2　沙發。
【查娒】ㄗㄚ├　ㆠㆦˋ　tsa7 boo2　女人。
【娒囝】ㆠㆦ　ㄍㄧㆩˋ boo1 kiann2　妻子兒女。
【𣍐曉】ㆠㄝ└　ㄏㄧㄠˋ(漳)　／　ㆠㄨㄝ└　ㄏㄧㄠˋ(泉)
　　be3 hiau2(漳) / bue3 hiau2(泉)　不曉得、不會。
【博徼】ㄅㄨㄚ└　ㄍㄧㄠˋ　pua3 kiau2　賭博。
【變𠇺】ㄅㆪˋ　ㄍㄚ˙　pinn2 kaO　變得、搞得。
【四界】ㄒㄧˋ　ㄍㄝ└　／　ㄒㄧˋ　ㄍㄨㄝ└ si2 ke3 / si2 kue3
　到處。
【工課】ㄎㄤ├　ㄎㄝ└(漳)　／　ㄎㄤ├　ㄎㄨㄝ└(泉)
　　　　khang7 khe3(漳) / khang7 khue3(泉)　工作。
【穡頭】ㄒㄧㆵ'　ㄊㄠˊ　sit8 thau5　事情、工作。
【載誌】ㄉㄞ└　ㄐㄧ└　tai3 tsi3　記載於誌。引申為事情。
【𣍐曉】ㆠㄝ└　ㄏㄧㄠˋ(漳)　／　ㆠㄨㄝ└　ㄏㄧㄠˋ(泉)
　　　　be3 hiau2(漳) / bue3 hiau2(泉)　不懂、不會。
【呣𢓶】ㆬ└　ㄊㄤ（ㆬ└　ㄊㄤ├） m3 thang1(m3 thang7)
　不可、不能、不行、不得、不當。
【𢓶好】ㄊㄤ├　ㄏㄜˋ　thang7 hor2　好能。
【𪝋濟】ㄒㄧㆫ├　ㄗㄝ├(漳)　／　ㄒㄧㆫ├　ㄗㄨㄝ├(泉)
　　　　siunn7 tse7(漳) / siunn7 tsue7(泉)　太多。
【偏去】ㄆㆪ　ㄎㄧ˙(漳）　／　ㄆㆪ　ㄎㄨ˙(泉)
　　　　phinn1 khi0(漳） / phinn1 khu0(泉）　被佔便宜。
【𫝛款】ㄒㄧㄤ└　ㄎㄨㄢˋ　siang3 khuan2　相同、一樣、同樣。
【一抔】ㄐㄧㆵ　ㄅㄨˊ　／　ㄐㄧㆵ　ㄅㄨ├
　　　　tsit4 pu5 / tsit4 pu7　一坨。
【看𥌚】ㄎㄨㆩˋ　ㆠㄞ├　／　ㄎㄨㆩˋ　ㄇㄞ├
　　　　khuann2 bai7 / khuann2 mai7　看看。
【創啥】ㄘㄨㄥˋ　ㄒㄧㆩㆷ　tshong2 siannh4　幹啥、做啥。
【拄仔】ㄉㄨ　ㄚˋ　tu1 a2　剛才。
【生鉎】ㄙㆥ├　ㄒㄧㄢ　／　ㄒㆪ├　ㄒㄧㄢ
　　　　senn7 sian1 / sinn7 sian1　生鏽。
【相佩】ㄒㄧㄜ├　ㄆㄨㄚㆷ’　sior7 phuah8　相交或相疊披掛。
【變巧】ㄅㄧㄢˋ　ㄎㄧㄠ└　pian2 khiau3　①變化巧妙。　②變通技巧。
【刜草】ㄆㄨㆵ'　ㄘㄠˋ phut8 tshau2　砍除雜草。
　　刜‥《說文》：擊也。《玉篇》：斫也。《集韻》：斷也。
【遮個】ㄐㄧㄚ　ㄝˊ（ㄝ˙） tsia1 e5(e0) 這個、這些。
【工課】ㄎㄤ├　ㄎㄝ└(漳)　／　ㄎㄤ├　ㄎㄨㄝ└(泉)
　　　　khang7 khe3(漳) / khang7 khue3(泉)　工作。
【討趁】ㄊㄜ　ㄊㄢ└　thor1 than3　討生活、賺錢。
【壞去】ㄏㄞ├　ㄎㄧ└(漳)　／　ㄏㄞ├　ㄎㄨ└(泉)
　　　　hai7 khi3(漳) / hai7 khu3(泉)　壞掉、掉了。
【歹去】ㄆㆮˋ　ㄎㄧ└(漳)　／　ㄆㆮˋ　ㄎㄨ└(泉)
　　　　phainn2 khi3(漳) / phainn2 khu3(泉)　壞掉、掉了。
【達人】ㄉㄚㆵ　ㆢㄧㄣˊ(漳)　／　ㄉㄚㆵ　ㄌㄧㄣˊ(泉)
　　　　tat4 jin5(漳) / tat4 lin5(泉)
　　指在某方面，非常精通，或能力超強的人，義同「專家」或「高手」。
　　此義於二十世紀末，所出現之外來詞，源於日語。
　　如：美食達人、達人秀。
【𪝋貧憚】　ㄒㄧㆫ├　ㄅㄧㄣ├　ㄉㄨㆩ├　siunn pin7 tuann7
　太懶惰。
【日頭晝】ㆢㄧㆵ　ㄊㄠˊ　ㄉㄠ└(漳)　／　ㄌㄧㆵ　ㄊㄠˊ　ㄉㄠ└(泉)
　　　　　jit4 thau5 tau3(漳) / lit4 thau5 tau3(泉)
　　中午。
【掃塗骹】ㄙㄠˋ　ㄊㆦ├　ㄎㄚ　sau2 thoo7 kha1　掃地。
【續落去】ㄙㄨㄚ└　ㄌㄜ˙　ㄎㄧ˙　sua3 lor0 khi0　接下去。
【羅漢骹仔】　ㄌㄜ├　ㄏㄢˋ　ㄎㄚ├　ㄚˋ　lor7 han2 kha7 a2
　　此謂單身漢、王老五。
【大主大意】ㄉㄨㄚ└　ㄗㄨ　ㄉㄨㄚ└　ㄧ└　tua3 tsu1 tua3 i3
　自作主張。
【有好無䆀】ㄨ└　ㄏㄜˋ　ㆠㄜ└　ㆠㄞˋ u3 hor2 bor3 bai2
　　　有好處，無壞處。
【千里馬，關咧水牛椆。】潘文良台諺。喻有才者受困，而無以發揮。
　　意如台諺‥勇勇馬，縛佇將軍柱。
　
【囥】{白}ㄎㆭ└　khng3　{變}ㄎㆭˋ　khng2　放置、存放。
【𪝋】{本}ㄒㄧㆫ　siunn7　{變}ㄒㄧㆫ├　siunn7　太、甚也。
【呰】{白}ㄐㄧㆵ　tsit4　{變}ㄐㄧㆵ'　tsit8　此、這。
【𨑜】ㄏㄧㄚ　hia1　那、那裡。
【啉】ㄌㄧㆬ　lim1　飲也。
【位】ㄨㄧ├／ㄨㄧ└　ui7/ui3　從、自（到某處）。
【𢓶】ㄊㄤ　thang1　{變}ㄊㄤ├　thang7
　能夠、可以。（𢓶為「通」異體，以別「通」義。）
【悿】{本}ㄊㄧㆰˋ　thiam2　{變}ㄊㄧㆰ　thiam1　勞累、疲憊。
【𤺪】{本}ㄒㄧㄢ├　sian7　{變}ㄒㄧㄢ└　sian3　厭倦。
【硎】華〔ㄒㄧㄥˊ〕　磨刀石。
【𩰒】ㄉㄠ└　tau3　{變}ㄉㄠˋ　湊、幫忙。
【｛勿愛）】華：〔ㄇㄞˋ〕
　　　台：{本}〔ㄇㄞ└〕[mai3]　{變}〔ㄇㄞˋ〕
　　　　　{本}〔ㆠㄞ└〕[bai3]　{變}〔ㆠㄞˋ〕
　　台語「勿愛」連音造字。即‥無愛、不要的意思。
　　從勿，含有禁止的意思。
　　江浙人用「𧟰𡠍覅」、客語人用｛莫愛｝。
【仾】華：〔ㄏㄨˋ〕
　　　台：{本}〔ㄏㆦ├〕[hoo7]　{變}〔ㄏㆦ└〕
　　　　　{本}〔ㄏㄨㄥˊ〕[hong5]　{變}〔ㄏㄨㄥ├〕　{泉變}〔ㄏㄨㄥ└〕
　　「互人」（予人）連音用字。被人。例‥
　　仾知：被人知道。
　　仾唸：被人唸。
　
※本文發表於「新聞台」。2017.11.01.三　19:49:04
 　http://mypaper.pchome.com.tw/avun01/post/1373286166
※本文分享於「臺語學院」。2017.11.01.三　19:54:00
 　https://www.facebook.com/groups/978821105480673/permalink/1890061837689924/
※本文分享於「台語生活社」。2017.11.01.三　19:55:00
 　https://www.facebook.com/groups/1524327644503170/permalink/2013883498880913/