◎台語瀕危

　　　　　　　　　　　　　　　　　○潘文良　撰

　　看著新聞媒體：「台語瀕危，三十年後滅亡？」的標題——
身為「台語人」，難免也會「心有慼慼焉」！會當感受著，言論者之憂心‥「危機感」與「使命感」。
　　但若是「事不關己、漠不關心」者，看著聽著，心內大概會想講‥
〔台語興亡，干我屁事？暗頓要食啥，明仔早起，要安怎去趁錢，對我來講，則是重要的！〕
　　標題：「台語瀕危，三十年後滅亡？」是拍「問號」（？）——
歸氣拍「驚嘆號」（！），則較「驚人」吧！
　　「台語瀕危，三十年後滅亡！」
　　喊嘩如此「危言聳聽」的口號，對「振興台語」，會當有偌濟的助益？
　　這使阿文，想著選舉的時陣，侯選人，有如「八仙過海——各顯神通」……花招百出，用盡手段！
　　每有候選人，因為「民調」落後，著會嘩出（貼出）‥「危險！危險！危險！搶救！搶救！搶救！」的口號。
　　呰款口號，對選情，會當有偌濟的助益？
　　所謂「民調」者‥「民調民調〔ㄉㄧㄠ└〕，要懸要低家己調〔ㄉㄧㄠ├〕！」
（華語‥「民調民調〔ㄉㄧㄠˋ〕，要高要低自己調〔ㄊㄧㄠˊ〕。）
　　民調懸低，著會影響選票的濟少嗎？實在未必然也！
　
　　台語三十年後，會滅亡無？
　　事實上，呰款問題，著親像‥
「地球佇三十年後，會爆炸無？
　西元二〇二〇年，會世界末日無？」
（世界末日預言，頂擺是：二〇一二年十二月三十一日，下擺是西元二〇二〇年。）
　　著算真正會發生，你會無法度改變（無法控制）——煩惱憂心，是自討苦食！
　　
　　「台語三十年會後滅亡」，這是安怎「推算」出來的？　且問‥
「你會當保證‥你、你的囝、你的孫，會曉聽、會曉講台語！
　但你會當保證‥你的曾孫、曾曾孫……抑佫會曉聽、會曉講台語無？
　你會當斷定‥你的茨邊、你的親情朋友，會曉聽、會曉講台語！
　會當斷定‥你的茨邊、你的親情朋友的囝，會曉聽、會曉講台語！
　但你會當斷定‥𪜶的子孫，會變安怎？」
　　事實上，你無法保證，也無法斷定‥三代，或者只是十年、二十年、三十年後，會變做啥款——既然無法保證、無法斷定，那「台語三十年後會滅亡」之「預言」，也只不過是嘩出來‥「警惕人」人而已！ （講好聽是「警惕人」，講實在是「恐嚇人」。）
　　「世界末日，即將到來！」
　　信者信之，不信者，嗤之以鼻！其「警惕作用」，會當有幾分咧？
　 　
　⊕閩南語、福佬話，有貶抑、輕視之意？
【閩】華：ㄇㄧㄣˇ　台：{文}ㆠㄧㄣˊ[bin5]　{白}ㆠㄢˊ[ban5]
　《說文》：東南越種。
　《廣韻》：閩越。
　《周禮．夏官》：職方氏，辨其邦國、都鄙、四夷、八蠻、七閩。
　《史記．東越傳》：閩越王無諸。〔註〕東越之別名。
　〔註〕按《說文》云：閩，東越，蛇種也。故字从虫，門聲。
　《山海經》：閩在海中。〔註〕閩越卽西甌，今建安郡是也。
　
　　「閩」者，即今「福建省」之簡稱也！
　　台語人，翻看家己的祖譜，應該大部分的祖先，攏是位福建漳州、泉州，過來台灣的。
　　福建（閩），著是㑑的根源——著算㑑的祖公，渡海來台灣，落地生根、生湠，福建（閩）對後代的㑑來講，在感情、認知上，已經是真遙遠、真生疏，但無論如何，你也無法度去「否認」‥㑑的祖先，是福建人（閩人）。
　　台語，源於「閩南語」（閩南語，源於古漢語），這是不爭的事實——台語若是去除「漢語、閩南語、外來語」的語詞，請問‥抑賰偌濟，是真正「純粹、純正」的「台語字詞」咧？
　　為何有一括人，哪會赫恁奇怪、赫恁矛盾？一方面，享用祖先的遺澤（遺產）；一方面，卻是棄嫌祖先，想要劃清界線，割捨（否認），佮祖先的關係！（華諺云‥「真是‥得了便宜還賣乖！」　老爸給囝講‥「你要佮我『斷絕關係』？有才調，簽一張啊『財產拋棄繼承同意書』，來予我看𥌚！」）
　　雖然，紅嬰仔一出世，脫離母體，臍帶鉸斷，著是「獨立的個體」，但是‥血緣關係，是割捨𣍐斷的！
　　祖先是「閩」（東越蛇種），予你感覺真見笑？害你無面子、無法度擔頭、無法度出頭天？
　　祖先做大官，乃至做皇帝也好；做乞食，乃至做山賊也罷！祖先著是祖先——著算你「登報作廢」，百千萬人，予你做見證；去法院申告「斷絕關係」，法院做出「同意」的判決，你也無法度，改變事實。
　　神話故事‥
三太子李哪吒，殺九龍、諸魔。
父怒其招惹諸魔之兵，後患難止，欲殺之。
哪吒憤而持刀在手，割肉還母、剔骨還父，而抱真靈，求全於佛祖之側。
佛祖以其，能降魔故，遂折荷菱為骨、藕為肉、絲為筋、葉為衣而生之。
　　如是「割肉還母、剔骨還父」，著會當「斷絕親子血緣」之事實嗎？
　　有的人，功成名就、賺大錢啦！煞棄嫌蹛佇莊骹，含辛茹苦，將伊飼養大漢的老爸老母、阿公阿嬤，唉！真是‥不肖的囝孫！
　　祖先是龍、是蛇（蛇者，小龍也）、是虎、是豹，是你無法度選擇的！否認也無濟於事，無法改變事實，重要的是‥你是要做啥麼？　做蛇、做龍……做畜生，抑是要做人？　做鬼，抑是要做神？　做菩薩，抑是要做佛？
　　來路無揀選，去路當慎擇。一念十法界，十道隨你行！
　　
　　所謂「福佬」，是粵客對福建人的稱呼，福建人，著是福佬人；福建人講的話，著是福佬話。
　　有的人認為‥「佬」是一種貶稱！
　　阿文著會講‥「『佬』若是貶稱，和事佬，你著呣𢓶做！」
　　「老、佬、姥」三字，其實意思是相通的，「和事佬」，又寫作「和事老」；外省人，稱外嬤為「姥姥」。
　　《維基百科》佬‥
　　佬是粵語中，一個常用稱謂，有時，亦被客家話與閩南話採用‥
一、指某類或某種人，粗俗的稱呼，如‥
　　美國佬、英國佬、鬼佬、四川佬、差佬、豬肉佬、
　　肥佬、傻佬、衰佬、鄉下佬、高佬、大隻佬。
二、成年人（或中年人），與仔（年青人）相對。
三、男人，與婆（女人）相對。
四、兄弟、朋友之間的稱呼，如‥大佬、細佬。
　　「佬」者，如「老」，台語人，叫人「老猴、死老猴」，則含有貶抑、輕視之意，單一字「老」字，意思真濟，何來貶抑、輕視？
　　恐驚是有的人，是「食老呣認老」，人講伊「老」，伊著無歡喜！
　
　　過去，有人講‥「台客」是一種貶稱，所以創一「華客」還之。
　　阿文講‥「『客」若有貶意，那自古以來的‥墨客、俠客、幽客……豈非攏總是貶稱？」
　　阿文每言‥「人不自辱，誰能辱之？」
　　諺語‥「面子是別人給的，臉是自己丟的。」
　　學生畢業時，校長老師，往往會鼓勵學生，而講‥
「今日你以○○為榮、明日○○以你為榮！」
　　事實上，位某某學校畢業的學生，有誤入歧途，做惡做歹、販毒、搶劫、刣人放火的；也有成為大頭家、做議員、做官的——某某學校，是好是壞？是榮是恥？
　　福佬人，若是做一括歹載誌，予人看𣍐起、予人侮辱，本是「理所當然」；若是做了對社會、對人世間，有助益、有貢獻的載誌，自然著受人尊敬。
　　家己做無好、無做好、好無做，予人看𣍐起，呣反省、檢討家己，煞去怪別人，貶抑、輕視，豈非本末倒置？
　　是予「福佬人」的名聲有光彩，抑是予「福佬人」卸面子；令人敬重，抑是令人貶辱，概在家己的言行也！
　　台灣人，若是去外國，免講為非做歹，乾燋佇大街路上、公共場所，隨便呸痰、亂𢳱垃圾、要亂插呣排隊、講話大細聲……著會卸台灣人的面子——
如是外國人，稱「台灣人」（真無水準），便有貶抑、輕視之意——
敢講按爾，你著會「恥為台灣人」？從此否認，你是台灣人？
　
　　社會上，有一括人，為著推廣台語，盡心盡力；卻也有一括人，受著著「政客」的影響，帶著無明的仇恨心，歸工刺舉舉（像刺蝟共款），講一括氣惱的話，一副想要「惹人受氣、冤家相拍」的架勢……實際上，對台語的發展，會當加幾分咧？
　　阿扁仔做總統的時代，一堆人，喊嘩「去中國化」——
結果‥阿扁仔的囝，名叫〈致中〉——怎會無去改名叫〈致台〉？
　　如今，喊嘩「愛台灣」的總統，名叫〈英文〉——是呣是應該去改名叫〈台文〉，則會當顯示，伊是真正咧「愛台灣」，呣是嘩假的？
　　予政客牽咧玲瓏踅，𨓚咧尾後，搖旗吶喊，實在是「食飽換枵」罷了！
　　啥麼人，做總統，你嘛是愛出去討趁，則有𢓶食穿——總統一個月，領赫恁濟薪水，抑𣍐分你一角銀。
　
　　　　　　＊　　　　　　＊　　　　　　＊　　　　　　＊
　
　　以下，是阿文對「推廣母語」的一括想法！
　　「母語」的推廣，首要是愛使「父母覺醒」，父母若是覺醒，會當教（佮）家己的囡仔講母語，著呣免予去學校「學母語」——父母對的是個人，學校老師，對的是對眾人。
父母若無覺醒，要專靠學校老師「調教」，這是誠拚咧！除非是囡仔，家己覺醒，願意真心學習，若無咧？恐驚一下課，著會放予𣍐記去！
　　老師佇學校講課，實在呣免限定一種語言，華語、客語、台語，老師若會曉，其實會當同時教學，老師會曉講原住民語，無妨也隨機教學；字詞句讀，華語、客語、台語、原住民語、英語……要安怎講，攏趁好講一遍，予學生，知影意思，譬如‥「請、對不起、謝謝」，華語、台語、客語、英語、日語……是要安怎講——著算𣍐曉講，踥踥聽，至少嘛聽有；畢竟生活上、環境中，茨邊隔壁、去菜市仔，講啥麼話的人攏有。
　　「母語教學課」，則是對各母語，進行較深入的教學——但𣍐使以「族群」去分，而是學生，可以隨其興趣，選伊想要學的去學，頂學期，學一種；下學期，學另外一種，隨其所喜；課堂中，則以一種母語為主，而以其它語言為輔。
　　各種語言，本無尊卑貴賤之分——攏去予人變變壞！（因為政治立場、思想的介入，本是單純的載誌，嘛變𠇺真複雜。）
　　學習語言，乃至學習任何學科，其實攏是真趣味的載誌，只是，攏去予大人「教教壞」——
國文老師，講國文真重要，愛好好學習！
數學老師，講數學真重要，愛好好學習！
英文老師，講英文真重要，愛好好學習！
公民老師，講公民真重要，愛好好學習！
歷史老師，講歷史真重要，愛好好學習！
地理老師，講地理真重要，愛好好學習！
物理老師，講物理真重要，愛好好學習！
化學老師，講化學真重要，愛好好學習！
科學老師，講科學真重要，愛好好學習！
健教老師，講健教真重要，愛好好學習！
美術老師，講美術真重要，愛好好學習！
音樂老師，講音樂真重要，愛好好學習！
家政老師，講家政真重要，愛好好學習！
工藝老師，講工藝真重要，愛好好學習！
體育老師，講體育真重要，愛好好學習！
…………
　　請問‥「有陀一項，無重要，會當免好好學習的？」
　　老師若講伊教的課無重要，學生會當免好好學習——伊敢是準備要失業，拍算轉去食家己？所以‥攏愛講重要。
　　啥麼學科攏重要，所以逐科攏愛學，於是‥冊包仔，負𠇺重垂垂，作業功課一大堆，逐工咧考試……學習，變𠇺有夠悿，使人厭𤺪！
　　「鄉土語言教師」，強調家己教的，是真重要的，其是也是‥「賣花說花芳、賣香說香芳、賣酒說賣芳；賣魚的，魚臭腥，伊嘛講魚是芳的——魚煎煎咧，嘛是有夠芳」——事實上，學生會曉講、𣍐曉講母語，嘛是按爾生活、嘛是按爾過一世人。
　　若是生活過得去、退休無載誌做，愛教，會當去社區發展協會教——看你要安怎教，隨在你教，無錢你嘛趁好教！
　　
　　忽然間，想著一個，趣味的問題！
　　啥麼是真正的「尊重」？
　　台灣囡仔，若是佇「母語課」，選擇去學「客語」，你是伊的父母，你會安怎講？
　　一、「㑑是台灣人，你是去學啥客語？㑑台語，佫三十年，著要滅亡啊！你呣好好啊學，佫去給我學啥麼客語？去給我改轉來學台語！」
　　二、「學客語嘛好！加會曉講一種話，有好無歹。」
　　你是贊成，抑是反對？是樂觀其行，抑是心內𣍐爽？
　　你是尊重囡仔的選擇，抑是想盡辦法，禁止伊去學客語，扭轉、強迫伊，愛去上台語班咧？
　　
　　客語老師問‥「台生啊！你不是講台語的，怎麼也來上客語班？」
　　台生道‥「啊著……啊著……著……我隔壁班的那個女生，很漂亮……很好……我喜歡……她來上客語班，我也就來上客語班了呀！」
　
　　　　　　　　　　　　　　　　　　　　2017.04.05.三　01:56:30
　
※聯合新網網。2017.03.05.日　03:07:00
　 聯合報 記者陳宛茜、彭宣雅／台北報導
◎台語瀕危，三十年後滅亡？
　https://udn.com/news/story/10891/2321288
◇維基百科。世界末日預言表
　https://zh.wikipedia.org/wiki/末日預言列表
◇維基百科。佬
　https://zh.wikipedia.org/wiki/佬