(再轉貼一篇我在另一個新聞台寫的文章。題目仍是包剪揼，嘻嘻，好玩！)


※※※


一開始，鏡頭看見兩個男人面部的大特寫。只見二人互相對望，目露兇光，一滴冷汗從甲的面上緩緩流下。

鏡頭拉開，二人正身處卡拉OK房間內，兩個人都定格於一個划拳的動作，但身後其他人則以快鏡移動著。

鏡頭close-up甲。
甲(內心VO)：上一鋪佢出包，今次都應該會出包，咁我應該出剪…

鏡頭close-up乙。
乙(內心VO)：我上鋪出包，佢可能估到我今次都一樣而出剪，咁我就應該出揼…

鏡頭close-up甲，面上冷汗越來越多。
甲(內心VO)：不過佢可能估到我估到佢出包而出剪，於是改出揼，咁我咪應該出包…

鏡頭close-up乙，面上肌肉開始抽搐。
乙(內心VO)：佢可能估到我估到佢估到我出包而出剪所以改出揼，因而轉出包，咁我應該出剪…

鏡頭快速在二人間轉換。
二人(內心快速VO)：…佢估到我估到佢估到我…出包… 出剪… 出揼… (越來越混亂)…包？剪？揼？…
(忍受不了壓力，齊聲大叫)：呀~~~~~

鏡頭拉wide，K房中只餘下他倆，其他人早在不知不覺間走了。此時，一個waiter拿著帳單走過來。

Waiter：先生，你地定格咗成五個鐘，我地要打烊喇，唔該埋咗張單先再定過吖！