我的心神啊,你當讚美耶和華
凡若在我內面的,亦着讚美祂的聖名

我的心神啊,你當讚美耶和華
不可不記得祂一切的恩惠

祂赦免你攏總的罪
醫好你攏總的病

祂救贖你的生命脫離死亡
用仁愛及慈悲做你的冕旒

用好物足你的心願
使你復到少年親像鷹鳥

祂無照咱的罪惡款待咱
亦無照咱的罪惡報應咱

因為天離開地許呢高
祂的慈愛對敬畏祂的人亦是許呢大

東離開西有多遠
祂使咱的罪過離開咱亦是許遠

老父怎樣憐憫他的子兒
耶和華憐憫敬畏祂的人亦是如此

因為祂知咱的體質
思念咱是土粉

論到人,他的日子親像草
他的興旺親像山裡的花

經過風一下吹,就無去
他的原位不再認得

總是耶和華的慈愛歸於敬畏祂的人,從永遠到永遠
祂的公義亦歸於子子孫孫

就是那些遵守祂的約
紀念祂的教示來遵趁的人

耶和華在天頂設立祂的寶座
祂的國權管轄項有

恁這些有大權能的天使啊,聽祂的聲,成祂的命令者,攏當讚美耶和華
恁諸個做祂的差使,行祂所歡喜的,攏着讚美耶和華

恁一切祂創造的,在祂所管理的各位,攏着讚美耶和華
我的心神啊,你着讚美耶和華