可能大家見我呢幾日成日扮叉曬失落浪子，或者見到我啲言詞間又似係苦痛不堪咁，最後睇埋呢篇個題目，就斷估我應該係講緊自己情場失意，弱弱智智啦！

　照正常邏輯，呢個推論都相當合理o既。但實際上，我根本就係一個唔多正常o既人，所以，你地o既斷估係錯的。簡單來說，我呢篇唔係想借王菀之首《我真的受傷了》來抒發我被人飛鬼左或者食檸檬o既感受。其實，我真係想講：我真的受傷了囉。

　大佬，如果我被人飛左，失左戀，我重邊會得閒上網打網誌呀，梗係即刻去女朋友屋企含吹奶啜咬，務求短時間內箍煲啦！(現實中，我同親女朋友分手我都唔會去認低威的)

　咁點解好地地會受傷呢？當然唔係因為我唔開心到要界手或者自殘，整到自己受傷啦！

　受傷個經過係咁o既：話說小弟今朝早就去打籃球，見今日狀態又好又勁，梗係跑跑跳跳，球球搏到盡啦！今日狀態就好到似米高佐敦，朗拿甸奴再加埋傅嘉俊咁，弗到漏油。可惜，小弟忘記左樂極生悲這句老夫子常說的話。有一球，小弟躍起飛到盡咁搶個籃板球，英姿凜凜。怎知，有條蛋散，在我騰空時，衝撞我下方，(大約是左邊背部至臂部的位置附近，此時我雙腳仍懸在我空中)於是，我因這個估計不到的強力碰撞，整個人失去平衡，呯啪一聲，撻左係地。咁本身跌落地都無乜事，最大問題係我竟然背脊落地時，後腦跟住又一野－呯！冚左落地下到，當場痛到係地下轉來轉去，個口重有種血o既味道，嘩！真係差啲返去天父身邊報到。

　後來就即刻去場邊抖下，神智不清咁周圍望下望下，出面個班人(閒人，波友)就係到研究事發經過啦！有條友就教訓我大哥話咁樣衝過來我身體下邊，隨時會出大意外的。我二哥就說：「妖！佢跳得樣衰之嘛，關人咩事？」我當場打個突。跟住，他們完了那場比賽便坐在我身旁，睇下我呢個傷者死得未，二哥冷言道：「點呀？跳得咁核突，下次咪鬼跳啦！」我即刻止住自己流出來的鮮血，谷盡條氣說：「我頂你個肺！你低能架！你食屎啦！好威呀講完呢句！你係咪兄弟黎架，仆街啦去！」佢條契弟就擰擰頭沒有再吭出聲。我心入面當然繼續扯火，頂！我而家特登自己冚個頭落地下到架咩？我個頭腫到成粒牛丸咁呀！重要係到講風涼話，真係仆街，我真係想一腳伸埋佢到。但大家其實都應該知道，以我當時o既身體狀況，我係連企都企唔穩o既。

　原本我諗住打下波，抒發一下壓力，唉，竟然無啦啦，多撻疤，真係無陰功！所以，我真係奉勸大家，無論何時何地，都要注意安全，玩唔好玩到咁癲。

　最後條蛋散(其實係我大哥)，返到屋企幫我敷藥同埋噴藥水膠布，但痛楚依然沒有減輕的蹟象。如果再唔掂，唉，俾幾舊水去睇醫生算，我唔想我呢個大好青年咁乸樣就一世。




溫馨提示：
1)人衰行路，係會打倒褪的！
2)所以，若果有一排，你發覺自己命運不濟，心情欠佳，事事不順，再加上平地行路時左腳會踢右腳，你就記緊不要出街，否則，死左都唔知咩事。

p.s.今日我打得到呢篇野總算我大命，希望唔好有後遺症就得喇！(後遺症中，我最懼怕的是陽萎，有無專家可以幫幫我？)



後記：
　事發一日後，小弟麻煩那位天天坐我隔黎返工的醫生，幫我睇睇傷口。佢立刻答應，轉身拿了兩張紙巾，便在我天靈蓋上左按又按，(極專業，同埋個一刻感到好溫暖......唔好亂諗，我唔係處於思春期或者發情期中)吩咐我若感到痛便出聲。檢查完畢後，佢話：「後腦個度無乜野，只係皮外傷，因為個頭好硬，應該無咁易撞親。(成個跳起，好似插水咁跌落地下都無乜野？神眷顧！)而頸後面個部分就易撞傷啲，所以你如果過多兩三日重覺得痛，就要去照下x-ray。但我睇黎都無乜大礙。」

　總結：(女)醫生真好人。