聞得你話死咯，我實見思疑，何苦輕生得咁心痴，你係為人客死唔怪得你，死因錢債叫我怎不傷悲？你平日當我係知心亦應同我講句，做乜交情三兩個月都無句言辭，往日個種恩情丟落水，縱有金錢燒盡亦帶不到陰司，可惜飄泊在青樓負你一世，種花場上無日開眉

你名秋喜，只望等到秋來還有喜意，做乜才過冬至就被雪霜欺，今日春風無力唔共你掙得啖氣，落花無主就葬春泥，此後情思有夢頻頻寄，或者盡我呢點窮心慰下故知，泉路茫茫你雙腳又細，黃泉無客店問你向得誰棲，青山白骨唔知憑誰祭，衰楊殘月空聽杜鵑啼，未必有個知心共你來燒紙，清明空恨個頁紙錢飛，罷咯你若當你係義妻來送你入寺，等你孤魂無主仗下佛力扶持，你便哀懇個慈雲施佛偈，你轉過來生誓不作客妻，若係冤債來償罰你落花粉地，你便揀過一個多情早早見機，我若與你未斷情緣重有相會日子，須謹記，念下前恩義，講到銷魂兩字，共你死後唔遲