五月的天，白紅紫黃選美拚媠

舒適的季節，對陀湧出秋天的哀澀

敢是阮使性地，予寂寞四界佇風中走攛

暗暝的夜空閃爍，陀幾粒星伴我咧顧暝

思念慢慢仔湠開，夜愈暗陀位會愈光

攑頭連天的柔情蜜意，目墘無力無力通阻擋

五月的心，淡薄仔淡薄仔甘甜青澀

海邊軟湧綿綿，湧來湧去敢有永遠的相思

心肝頭雄雄變黑白，彩色的春光換月娘當天

時鐘的發條軟汫，按怎轉踅過去甘甜蜜意的戀夢

月中天茫渺渺，愛之船頂的海湧一波來一波去

初三的月娘眯目睭來偷看，微微仔笑出禪意

咱的戀夢永遠退湧，只有海湧永遠無了時

五月的雪花若夢，規山頭白茫茫的油桐

夢戀夢，心頭亂，怨天哪無照甲子

輕風微微，春雨綿綿，款款佇枝葉頂潑醒拍醒

一個無細膩落佇塗跤滿滿滿，親像反白的紅地毯

雨綿綿戀夢戀，風微微夢戀夢，哪會予風雨來摧殘

妖嬌的愁緒絚絚絚，綁佇阮的心肝頭
輕輕 輕輕 輕輕仔 等待，等待 等待 風 雨 歇