七月卅一號去做產檢, 豬豬B已經3.6公斤重啦, 即係36週左右就同哥哥出世差唔多一樣咁重...咁醫生就話要催生啦, 因為等到預產期八月尾就太重好難生咁喎...

真係好緊張, 因為上次生既痛楚仲未忘懷到, 今次好怕, 成日叫佢唔好出世住...估唔到醫生居然叫我:你今日或者聽日入院生啦! ......真係難以接受!

返到屋企好唔開心, 一來唔係好想經歷o個種痛(雖然始終都要架啦..), 二來真係決定唔到邊日入院生(因為唔係好想我去決定佢几時出世...), 本來想約八月八號或九號, 但係原來個個都想奧運開幕生所以book到full曬...所以成晚都好唔開心...直到大豬話:咁唔好諗啦, 等佢自己出世囉, 生唔到咪開刀囉!.....跟住我先鬆一口氣

一個星期之後即係八月七號, 又去做產檢, 好在豬豬B都係差唔多大, 不過醫生都係叫我催生, 仲叫我一陣間就入院添! 其實今日我都準備左架啦, 於是就同媽咪, 老爺奶奶講同埋陪月員講定, 仲準備入院添! 一路撘車返屋企搵野一路就同豬豬B講:你今日要出世啦!

返到屋企差唔多想出門口既時候, 醫生打黎話今日做唔到催生...結果有d失望, 不過都book到九號入院, 咁即係八號可以係屋企睇埋開幕禮先啦hehe

唔知係咪因為我叫左佢快d準備出世呢, 呢一兩日都覺得好似有d陣痛咁, 但係因為唔係好定時, 所以就無入院啦...

到左九號, 朝早五點半就起身啦, 食完大豬煮既餐旦公仔面早餐之後就出發去醫院啦! 去到浸會醫院已經七點, 做左一大堆入院手續都已經七點几, 跟住姑娘就同我檢查啦, 佢一check就話:噫你有冇痛呀? 宮頸己經開到4度啦喎!....其實我呢几日都有痛, 仲覺得就係呢几日會出世添! 咁我就問咁仲洗唔洗催生呀, 姑娘話要呀, 都唔痛點生得出呢?

係我無心理準備之下, 就病房又唔洗去, 待產房都唔洗去就直入產房啦, o個時我都仲係一d痛都無喎! 我諗大豬都無心理準備...不過生仔呢...係咁突然架啦...

入到產房八點鐘就打催生針, 心入面就諗希望九點就生啦(其實有d妄想), 跟住陣痛開始啦, 都唔係好強烈...大豬一路係身邊陪住我^^ 之後越來越痛, 好在有麻醉氣可以聞hehe...之後痛下痛下, 居然真係九點鐘就想生啦!

九點零九分, 豬豬B出世啦!

真係乖呀!居然痛左一個鐘, 加埋就無痛左廿次就生左BB啦, 真係出乎意料之外! 估唔到我d預感好準喎!

其實一開始有豬豬B, 我就怕會突然係屋企穿水要生, 所以先會都係政府醫院掛單, 因為救護車唔會送我去私家醫院...估唔到咁好彩宮頸開到四度都未穿水! 而如果唔係咁啱book左九號生, 可能真係會係屋企穿水呀! 所以人地話我厲害, 我話真係好彩呀!

Anyway, 母子平安呢!