最動人o既承諾‥唔係係人都講得出口o既海枯石爛、地老天荒…
真正o既承諾…可能唔需要用口講‥因為心知道已經可以喇。

雖然以下只係一篇好短o既醫生手記文章‥但係已經足以令人雙眼通紅、鼻酸酸…

有一位老婆婆個子唔高，但係就好肥，行路o既時侯需要拐杖支持。
每隔兩個月，老公公都會陪老婆婆到醫院覆診，因為老婆婆患有高血壓。有一晚，老婆婆左邊身麻痺入院，經過電腦掃描顯示到右腦出血。我如實話比老公公知，佢無出到聲，只係好無奈咁望住我，淚水已經湧現。第二朝，意料之外，老婆婆o既情況唔係想像中咁壞，而且頭腦仲清醒。
入院之後o既第五日，老婆婆問我：呢兩日伯爺公點解無黎探我o既？一個實習護士話比我聽，早兩日老公公突然心肌梗塞，住左o係對面o既男病房。兩老無兒無女，最親o既都只係姪仔。今日，姪仔帶左兩樽果汁黎醫院，先先去探老公公，再去探老婆婆。
過左幾日，老公公o既病情剛剛穩定，就叫住要出院照顧老婆婆，經過一番溝通之後，主診醫生諗左一個折衷辦法：首先老公公換番自己o既衫，坐住輪椅，由工友推到女病房門口，而為左安全起見，醫生護士都要跟埋老公公一齊…
老公公蹣跚地企起身，手執果汁，走到去老婆婆床邊：買比妳飲嫁。
老婆婆嗲起黎：呢幾日唔見你o既伯爺公，咩事呀？病左咩？
老公公微笑：唔係呀伯爺婆…係姪孫結婚喇，我要幫佢打點一下嘛。
呢一個，係我咁耐以來聽過最動人最感動o既一個謊話。人生就好似變幻莫測o既天氣，雖然可以預料得到，但往往都出人意表…
老公公o既心臟日復日咁康復，準備出院o個日，病情突然惡化，撒手塵寰。姪仔辦理完死亡證明之後就黎搵我，要求暫時唔好話比老婆婆知，因為老公公死前遺言係：照顧伯爺婆，唔好話佢知我既事，我唔想佢受剌激。
呢個時候，無一個在場o既人唔感動、唔流下眼淚，包括我…
當日我巡房o既時侯，老婆婆又問：伯爺公ｄ果汁飲晒喇，點解佢又不見人o既？護士強忍眼淚：妳唔記得左咩？佢姪孫過兩日結婚啦嘛！老公公要幫手呀。
第二朝清早，我發覺老婆婆床頭多左樽果汁，聽到護士同老婆婆話：老公公岩岩黎過呀，佢見妳訓得咁甜，唔捨得叫醒妳，所以放低佐樽果汁就走左喇。
當護士一轉身發覺我企佐o係度o既時候，立刻雙頰通紅。我微微一笑，拍左佢膊頭一下，慶幸佢o個顆愛心，不為歲月冷卻。當日下晝，護士長察覺到坐o係梳發對住窗望風景o既老婆婆無左呼吸，我迅速跑去一手抱起老婆婆，再聯同護士將婆婆放上病床急救…搶救佐二十分鐘之後，我宣布失敗…我一邊寫報告記錄，一邊諗起「陪著你走」o既一句歌詞：如果，走到這世界邊端，我倆已是無力前行，跟我一起飛去…
護士長走過黎同我講：估唔到妳咁大力，一手就可以抱起老婆婆。
我只係以微笑回答，因為我已經唔想講任何野，我怕我會忍唔住眼淚…
老婆婆的確好肥，但係就好輕。因為佢o既靈魂已經跟老公公飛走左喇…