以下是傑傑友人"Herman兄"對《新紮師妹》的看法! 是一份好專業的影評,文筆非常精彩,睇到傑傑五體投地! 大家不妨細讀康仔的影評啦!


其實無他，《新紮師妹》同好多今日的港產片差不多，冇乜theme，都係得淡笑。不過，論搞笑，我卻覺得《新紮師妹》係極之成功的一環。為什麼？至少在成齣戲中，黃色笑話可說是少之又少；就算有，你不如說是女主角方麗娟(由楊千嬅飾演)大出洋相，instead of被人有好「黃」的感覺。
《新紮師妹》Ｄ笑話，搞笑Ｄ橋可能舊左少少；但係，成齣戲都有一種好清新的感覺，一來，單是比起這一兩年的港產片，那些唔係爆晒粗，充滿晒血壓暴力，就係集中於黃色笑話黎講。最要命的，就係某Ｄ主角，一係就Ｄ演技唔得，一係就中途性情大變，再唔係就「雖無過犯，面目可憎」！

老老實實，千嬅Ｄ演技好唔好，就因人而異，也許你會覺得，方麗娟呢個角色係為佢度身訂造，但試問一下，又有邊個主角Ｄ角色，唔係度身訂造至得架？但最起碼，對一齣鬧劇黎講，Ｄ角色唔會中途性情大變，一開始係咁，到尾聲時都係咁，而且個個角色，都發揮得到與眾不同的效果。而且，至少成齣戲Ｄ人，都唔多會有「雖無過犯，面目可憎」的感覺呢！

同埋，有人講得好岩，《新紮師妹》有點兒像一個港式童話故事，把不可能變成可能，更有點似「灰姑娘」的感覺；不過男女主角的愛，不是一見鐘情，一拍即合，而是一步一步培養，

途中多少都有Ｄ挫折。而這些挫折，成為了整齣戲最認真的地方，有一幕，方麗娟被迫同歐海文分手，雖然好夾硬黎，但係，歐海文(吳彥祖飾演)真係好慘，無厘頭咁被人飛左，而方麗娟咪一樣，雖然在下冇experience過，但係要同至深愛的人講分手，佢的感受會舒服嗎？

最令我印象深刻的一幕，就係方麗娟在警察局重遇歐海文，文根本沒有放棄，單係佢在警局時，冷靜的他都情緒失控，而方麗娟甚至不理上頭指示，當時佢也許是冒著失業之危，說了一句：「重新開始好嗎？」那一刻好touching，雖然之後的劇情又係一番笑鬧。

最後一幕，其實印象都好深刻；就係上篇日記都有提及，方麗娟不惜把自己的身份拆穿，飛電單車去阻止歐海文做蠢事。歐海文知道自己最愛的人，竟然都有欺瞞自己的地方，當然好嬲，不過之後方麗娟中槍，歐海文咪又係咁緊張？可見佢仲好深愛方麗娟。

不少童話故事，男女主角往往係一見鐘情，就一拍即合。至少，我個人認為，《新紮師妹》係一齣好好的童話愛情故事，亦可以見到，男女之間的關係，不是一朝一夕就可建立，但係，往往要經過好多考驗至得。仲有，如果你話《新紮師妹》係一齣童話，我絕對贊成，因為童話都可以都市化、現代化！