我諗你係唯一一個我真係好深咁鐘意既人，以前我一定要一個人先訓到，個陣你成日都話一齊攬住訓，起初我都好驚，但每次你都好開心，於是我先發覺原來，攬住訓都可以好舒服，記得有次下晝你攬住我訓，個次係我有記憶以黎訓得最舒服既一次，係好安全好舒服，你令我覺得可以信任同依靠。
我從來都覺得自己係一個不幸既人，開心既事一定無我份。但個陣遇上你，係最快活既日子，我覺得係個天一時大頭蝦，唔記得左安排d唔開心既事俾我，所以先可以同你咁開心，真係好似發夢咁樣，所以就算係而家，諗番起個陣，我都會好開心，雖然你已經唔會再好似以前咁，同我出去玩。
我都知道自己唔係靚女一名，不過有次你讚我，你話我笑起上黎，對眼好靚，我覺得你係唔係為讚而讚，因為我都覺得自己笑起上黎係好幸福既樣，而你竟然留意到，我覺得你真係用個心去欣賞我。
第一次你陪我去醫院，記得真係熱到死，又麻鬼煩，又要你去買水買野食，去拎藥，隔一陣又要你陪我去洗手間，我由細到大都好怕俾麻煩人地，會覺得唔好意思呀，但你真係一d怨言都無，個陣我係度諗，點解你咁好人既呢？你令我第一次病而唔覺得自己係負累，好輕鬆呀！
我係極度唔信人，所以鐘意乜都自己做晒去。個陣你踩單車，我坐係車尾。第一次坐上去，我都好驚，好驚你會跌，一跌就真係my god啦，但真係抱住信晒你既心態，我都好驚訝自己會咁信任一個人，每次抱著你，我都唔會擔心會跌落黎，因為我知道有你係我身邊。
最鐘意係你係前面，之後我一跑就跳上你背上，之後你一直揹住我，一齊好開心咁笑，呢個就好似係我同你既小遊戲，而每次你係我後面，叫「嘉茵」(普通話)，我就會好開心咁擰轉頭，「做咩呀你？」，真係好開心喎。
記得有次你唔肯同我係個湖前面影相，要同其他人影，我就嬲左你，之後你一行埋黎想一齊遮陰(我個陣拎住把傘)，你一行埋黎，我就哼一聲別過面去，之後你又知道我嬲乜喎，「乙米」番我，個次真係好攪鬼呢~~~~~
離開華山既時候，真係好依依不捨呀，因為上呢座山既時候，係我地手拖著手，一步一步咁行上去，最開心係日落個陣，望住日落，突然見到遠處既山，有一個好奇怪既小山峰突左出黎，你就指住佢話：「呢個就係我地座山啦！」仲幫佢影左張相留念添，後來去到北峰，趁大家唔為意，我同你係峰頂特登kiss咁影一張，身邊d遊客都話「年青人就是這樣了！」大家都笑起，我地真係好大膽啦！
有次去黃河瀑布，同你坐係最一排，夜晚我地一齊係窗口度睇星，你話有銀河，其實個陣我無戴眼鏡，只係見到一群閃閃下既星群，不過隱約又覺得真係好靚架！
朝頭早最鐘意走去你間房，靜靜雞咁鍚你一啖，然後又靜靜雞咁走左去，仲要次次你都唔發覺，每次你起左身，我話番你知，你就會投訴點解我唔叫埋你起身啦~~~叫醒左咪鍚你唔到囉~~~傻瓜~~
有次夜晚，成個廣場都無人，我同你係梧桐樹下度傾計，個晚好鬼大風，講起你屋企啦、去澳洲既事啦。我仲記得你個晚戴眼鏡個樣，薯得黎又好斯文可愛架！後來唔知點解突然好唔捨得你，就喊起上黎，你就攬住我，個一刻，我覺得世界上只有你同我。
我都唔識認路，最鐘意就係憑感覺行路，所以成日蕩失路。你成日同我行到邊就話我知呢度係邊，你話男人一定會記得路，不過你次次咁話我知點行，我都唔記得架啦，因為跟住你咪就得囉~~~~~^^"
有夜出完去買野，行番去既時候，突然你一手抱起左我，我只係見到眼前既街道，轉眼間，就變左一片漆黑既天空，個一刻真係天旋地轉，快樂到暈左添嘛！你成日抱住我，我都會問你倦唔倦，每次你都話：「唔會呀！你好輕喳嘛！」所以我覺得你其實係一個鐵人黎架！
有日下晝，係外邊行完街番黎，好鬼熱，沖完涼之後，就跳上左你張床度，你伏左係我心口，突然覺得同你好親近，之後我鼓起左好大既勇氣，講左一句唔應該講既野：「不如我地係埋一齊啦！」記得個一刻你係微笑住架。
有晚去唔成天堂鳥度飲野，我就同你行番去，去到運動場旁邊坐低，我訓左係你大脾度，望住你傾左好多野，包括一d直到而家都解決唔到既野，個次係你第一次講晒你d情史我知，hehe~~~~記得最後我問你，如果無左佢，你想唔想同我一齊，你好開心咁答話「想啊！」，個一刻，我真係覺得你係好想同我係埋一齊。
個陣成日病，要訓係床到，每次你都會搵到時間黎睇我，入左黎一陣，問我點啦，之後你就鍚我面珠一下架啦，好快又走左啦，費事俾人見到呀嘛！不過我都好開心架，次次都預感你會黎睇我架！
有次唔知係咪整瘀左隻腳，hehe，要你幫我搽跌打酒呀，呵呵，我好似女皇咁，不過我真係好開心呀，因為好幸福嘛~~~~~
有晚去完按摩，就一齊番去啦，突然我係條街度係咁跑賣甩你，跟住你就係咁追住我，好開心呀係咁笑，你追我呀嘛，最後都俾你捉住左啦，梗係啦，唔係跑得贏你呀我，其實我跑都係想俾你捉住喳嘛！hehe~~~~~
318係我地既秘密機地，好厲害架，因為間房條匙係我趁0個個伯伯唔為意既時候，移形換影咁撻番黎架，個次真係嚇到我面青口唇白呀！he，不過最攪笑有次我地係個度，竟然一齊怕有鬼，你咁大個男人都怕鬼既~~~~不過話時話，我都覺得間房有d恐佈架，唔~~~可能真係有野呀，唔係點會丟空左去呀，唔通真係預留俾我地咩~~好驚添~~~><
有次上堂要讀《簡愛》，一男一女part住讀，但最後竟然同唔到你一組啦，掉掉下位，就坐左係你原先個位，我靜靜雞係你本筆記簿度寫左「BB到此一遊」，仲要搵D筆遮住，扮晒有機關，點知你隻粗心怪，一坐低就摧毀左我個機關，仲要睇唔到我既墨寶，粗心到暈呀你~~~~~
係啦，點解我叫BB呢？話說有次你話要同我改個名啦，覺得我好細個，所以就叫做BB啦~~~是你的BB嘛！
個陣你成日講埋D「乙米」人既說話，每次我都會話你冤氣到死，慢慢你就學我，扮晒溫柔咁話人地冤氣，仲要係冤氣怪添！學我呀啦，衰到死呀你。
有次我買左件新衫，即刻換左佢黎著，你話唔好睇啦，跟住我就嬲左你啦，之後又再換左第二件，問你好無睇，你話好睇，我話你呃我，你就好真誠咁話「頭先我打開門見到你，就覺得你著得好靚啦，真架！」哈，都唔知你講真定假既！
有次我地去左自由行，我要去睇楊虎城別墅，點知搵左好耐先去到，去到竟然關左門，我就扮哭係個門牌前面影左張相啦。後來我地坐巴士番去，點知早左成兩個站落車，嘩~~~行左成條街，真係行到死左呀，不過又好開心啦，因為同你一齊呀，沿路仲有好靚既樹蔭，後來仲叫左班死0靚仔同我地影相呀，hehe！
臨走個陣，你叫我寫張post card寄俾你，仲要唔好俾你睇到係寫乜，番到黎，好幾次你都好惆悵咁話仲未收到，原來你會咁掛住張post card 仔喎，不過當然之後亦都因為張post card而引起既風波就令人好頭痛啦。
走之前個上晝，我地四周圍去影相，遇到對好好心既老夫婦，佢地個仔仔畢業。佢地幫我地揸機，仲叫埋我地要點樣去擺甫士，又話坐係邊度影會靚d啦，又話d陽光點樣先好，我地好開心，因為佢地真係好好人，仲影左d好靚既相，可惜最後你都整唔見晒啦，過份~~~~
有次同你去沙灘，你幫我影相，我記得每次你揸機影我，我都會好開心，因為我係由心咁笑出黎，我唔係對住個相機笑，而係因為相機背後，係我喜歡既人。個日天氣唔係幾好，一陣就落雨啦，我地走左去避雨，雖然都係得個等字，個一刻我覺得我地好情侶feel呀，就係會有d好無聊既時刻嘛！雨過左啦，我地一齊係沙灘度訓左係度，望住藍藍既天空，好自由自在呀，仲一齊食super size既pizzal薯片呀，你話係得7-11先有架。
去完沙灘就去左銅鑼灣，行經你以前做野間壽司店，跟住你就話我知你以前做野d事啦，關於wasabi同三文魚既事啦，你仲做過臨記同私家偵探，我覺得你好神奇呀，d咁特別既行業你都做過，真係估你唔到喎！

這是我最快樂的日子，永遠的記在心裡，我愛你。