前天和昨天都因為倦的關係,不是沒能量開電腦就是一早"交交豬"了,所以沒有寫日記呀!

4/4/02 "兒童節"
那朝想話早起身回中心工作啦,但點知早極都只是七點幾,是關半夜沒有睡過,直到2:30am開波,睇到成四點幾先去sleep,能夠有七點幾起身其實已經好叻了.(hehe,利物浦又勝利了)
不過就係好在早少少起身,八點兩三個字返到去,這樣就可以有成九個字"安靜"的時間工作呢!
放o左工睇睇o下報紙先知原來假期前都有六合彩賣,於是飛奔落去買,跟注例牌去打機,又係三蚊"快靚正"走人.不過不知是否多天的奔波,回到屋企個人勁倦呢!

5/4/02 "清明節--掃墓"
又係七點幾起身呀,因為約了舅父佢地去拜阿公呢!婆婆今年跟埋我o地去拜阿公,所以4號已經到了我家住.本來約了舅父8點半九龍塘等o架!但結果我們同婆婆成9點先去到,害舅父和表妹等到傻呢.
我們一行七人熱熱鬧鬧的出發,去到筲箕灣,一出地鐵站...嘩!勁多人呀~勁多人排隊等車去歌連臣角呀,我們在筲箕灣買埋少少o野都加入排隊的行列,好彩我們坐的是9號車,不用排好耐就上到車,如果係其餘特別線,我們不知要等幾耐了.上到山,婆婆沒有跟我們去拜祭,是關去阿公安葬的地方要行一段好斜的斜路.所以她坐在休憩處等我們,待我們拜完落o黎,就一起開餐...不知是否人多拜山的關係,給到我的感覺是好熱鬧,好開心似的,很多孝子賢孫,一家大細去拜祭先人,場面是歡祥的,我想所有的先人們都最想是見到在世的人這樣呢!
拜完阿公,我o地搵o番婆婆,然後霸個有利位置"開餐",這是我們第一次拜完山在附近"野餐"的,我就無乜所謂,但細佬就唔多鍾意了.不過無計,係媽媽要的,媽媽話想試o左好耐囉喎,但結果大家都吃得津津有味,因為有燒鵝,燒肉,鬆糕,生果等等好多o野食呢.而其實我就麻麻的喜歡,因為我唔鍾意用"手"食,我下次要帶埋筷子或叉先得.
拜完山,個個都帶注疲倦的身軀回家,不過個個都是回我的家,因為媽媽弄西餐給大家吃呢!就是因為太倦了,吃過晚餐後,我睇獅子山下睇到一半就倦到在沙化上睡著了.

6/4/02 "陪骰仔"
今日睡到成10點幾先起身,是關昨天真的太倦了.本來今日計劃同婆&媽飲過茶後,就去探BB和回學校借書的,但骰仔早上來的一個電話,成個計劃都亂了...事原係上星期骰仔在開工時,不小心弄傷了腳,在家呆了多天,悶到今日要搵人打牌解悶,我和阿青都見她這樣,於心不忍去推她,所以答應了...但打到五點,阿青非走不可了,所以剩o番我同大鼻陪骰仔睇vcd,睇完vcd,華華也到了.因此我們一齊去留下食飯,四個人食o下講o下,傾得鬼咁開心,傾到成10點先捨得走呢!