田野調查
熱人的海風淡薄仔漚翕
漚翕,渡船頭的跤步聲起起
落落,差一屑仔
共睏晝的蟬仔吵精神,汗流
沓(ta̍p)滴的外邦青年,怪奇的裝扮
掩嵌袂牢心狂火著的表情,樹蔭跤
穿插撆(pih)紮的Amijan,大肆機行倚
相借問,目鏡後古意的眼神
顯露對台東航向紅頭嶼
田野調查的起心動念
1933,好天濟雲、平波
無湧的下晡,註定
此去,走傱山林毋免孤身
獨影,南湖大山、雪山、劍山,步步
為營,探查冰斗、冰堆石、次高山鱒
多樣生態的千變萬化,第一
時間,拍開觀景窗予0.01秒堅凍,一筆
一劃,共原始的模樣刻踮樸實的手指簿仔,三不
五時,活跳的野鹿參山豬鼢(bùn)出來面會,獵銃
袂赴描準,標本Sayonara走敢那飛
軁(nǹg)入時間的磅空,掀開彼本年久月深
烏白的相簿,囡仔時足愛追掠展翅的金龜、
蝶仔、田嬰,愈網愈濟、愈飛愈懸
少年的眼界嘛綴咧愈夢愈遠,月外日
65款蝶仔標誌佇《蟲豸世界》裡,轉骨了後
飄洋渡海泅入台北高校,青春的意志
自在飛出學堂,草山、關刀山、
阿里山、八仙山,跤跡愈peh愈懸
成績單的紅字疊成一座新高山
落第的學生鍛練跤踏實地真功夫
有影,伊的功夫萬底深坑
濫歲月參血汗一滴仔一滴
灌沃,博物學、地理學、
民族學、考古學,無一項考伊會倒
頂港有名聲、下港上出名無才調滿足
帝都的胃口,規氣共徵召十三天地外
南島之南的南洋,繼續走揣
原始種族的牽連基因,無偌久
對雺煙散霧的戰場暗暗仔
行出未曾上卌(siap)的生命
1945,天公伯拍一个大?
記號佇北婆羅洲phàng見
袂記得轉來回鄉碼頭
博覽山林戇直的學者
黃昏西照日射迵窗框,投影
佇一甲子前的半舊相片裡,白髮
蒼蒼,體格瘦挑的身影,勻勻仔
彈奏少年時的青春戀夢,最後
將《鹿野忠雄》冊皮的坱埃(ing-ia)
輕略仔拌予清氣tam-tam
後記:詩寫博物學者鹿野忠雄(1906-1945?),兼記托泰˙布典佮伊的友情。
──2016.6.9寫佇赤崁南門仔
2016.10《台文戰線》第44號