日頭沓沓睇開目睭

勻勻仔伸勻

畏寒的身軀漸漸燒絡

佮大地同齊拍昲光

本底憂容的雲蕊成群結黨

被微微春風喚醒

踮溫暖的天幕頂懸

歡頭喜面

青翠的山嶺拄睏睜神

相像年久月深的屈勢

大佛鎮殿

笑看百樣眾生

神木老神在在

用伊算袂齊勻的年輪

泡一鈷春仔茶

參阿里山拍拉涼

飄浪的海洋綴潮流浮沈

起起落落袂輸走馬燈

鄉愁無底

毋知東時靠岸

海鳥軁過滾絞的湧鬚

用伊堅碇的翅股

奏一曲相思謠

予太平洋醉規暝

金黃的稻湧看無盡尾

厝角鳥仔飛懸飛低

佇透中日晝的樹蔭跤

彩畫一幅田庄豐景圖

白色鼓吹花徛亭亭

蝴蝶四箍笠仔轉踅

傳送清芳純潔

釘根曠闊天地

島嶼迷人的身世

是一本袂赴掀頁的史冊

親像流星閃熾

遐呢浪漫美麗

目一睨

風雲變化多彩歲月

翻一个身

雄雄驚醒萬紫千花

——2013.5.29寫佇赤崁南門仔

         2014.7《台文戰線》第35號