由《無米樂》導演莊益增、顏蘭權開五冬時間製作的《牽阮的手》，是一部有血有目屎、屬佇正港台灣人的史詩紀錄片。內底面有田朝明先生佮田孟淑女士自少年到老的堅貞愛情，閣較有怹手牽手作伙行過台灣人追揣獨立、自主的半世紀跤跡。

　當初時，一位是拄唯日本留學轉來的34歲醫生，一位是台南女中18歲的青春少女。雙人初見面四蕊目睭相拍電，增差16歲、尚且仝姓的戀情，佇彼個保守的年代，無可能受父母、親人的祝福，怹只好手牽手相掣（tshua）走。

　這一走，毋那走出半世紀較加的翁某情，嘛走出兩位追求台灣獨立、自主革命情侶的堅貞。唯掩護、救助白色恐怖政治犯開始，怹雙人行過美麗島事件、林義雄母女事件、鄭南榕自焚事件等不計其數的苦難歲月，一直到甲頭毛嘴鬚白、規身軀病疼猶原無放棄彼個堅持理想的初心。這款將人民同胞的身苦病疼、幸福權利，當作比家己生命閣較要緊的熱情，值得咱後輩人的敬慕佮學習。

　現此時，全國各地戲園當咧放送《牽阮的手》。敬請各位真心疼痛這塊鄉土的台灣人，逐家樓頂招樓跤，厝邊招隔壁，手牽手作伙行入戲園，用感恩佮感動的心，來觀看這部屬佇你咱台灣人的真情電影。

 http://hands2011.pixnet.net/blog.（牽阮的手網站）