反對佮攻擊用母語寫作的人，上界愛用的理由是恁的用字無一致，欲叫人按怎看有？若按呢，拜託遮的人先去批判義大利的文學家但丁佮英國大作家莎士比亞，怹兩人當初創作遐的偉大作品的時，義大利文佮英文的寫法離一致猶閣有不止仔遠的路途。台文作家現此時所行的路，就是過去但丁佮莎士比亞行過的路。無定著反對台文寫作的人會講：恁敢有寫出啥物偉大的作品？人講「家己褒，較袂臭臊」，是毋是偉大作品我毋敢講，這留予未來的歷史去證明。下底，筆者舉出幾位台文作家的優秀作品予逐家鼻芳，遮的作品提來佮台灣的華文作品相比併（phing7），一點仔都無輸人。

　　1987年，佇華語文壇已經寫出濟濟優質小說的作家宋澤萊，為著拍破一寡華語人認為「台語無法度寫出現代小說」的迷思，開袂少精神、氣力寫出三萬字跤兜的台語小說〈抗暴的打貓市〉。這篇小說運用現代小說的技巧內底，上界歹寫的意識流，另外閣加上魔幻寫實遮的前衛技巧，二十外冬後閣共（ka7）提起來讀，仝款是一粒仁仁仁的真珠。

    　2002年，林央敏用台語寫出九千外畷（tsua7）的史詩《胭脂淚》。這篇史詩除了運用各種現代詩的技巧，嘛融合詩經、唐詩、宋詞、南管音樂、七字仔、西洋史詩劇場等等形式，詩質豐富，音樂性十足。2011年，林央敏閣用台文寫出三十萬字的長篇小說《菩提相思經》。這部小說融合革命、愛情佮宗教，以寫實、諷刺、浪漫、禪悟、譬喻、象徵、魔幻、意識流等修辭手法，組織出有機形式的文學藝術。

　　2010年，胡長松出版台語長篇小說《大港嘴》。這部小說透過分散的敘述結構，藉小說人物運命的起落來暗喻台灣人長期被殖民的深沈、反省人性被扭曲的狀況、精神方面的困境佮通過信仰走揣突破的可能性。佇文學技巧頂面，《大港嘴》運用現代文學相當前衛的魔幻寫實，佇這部探討平埔族精神演變的小說裡，成做一擺成功的技藝演出。

　　以上所舉三位作家的例，宋澤萊、林央敏攏是五十外歲的中壯輩作家，胡長松是三十幾歲的青年輩作家，怹攏是唯（ui3）華文創作轉向台文創作，嘛攏有不止仔懸的成就。唯遮會當證明，只要用心拍拚，任何優秀的作家攏有可能用伊的母語寫出優質的文學作品。

──2010.5.28《自由時報》「自由廣場」