──以小說重建族群記智的文學家陳雷

摘　要

　　現此時蹛佇加拿大的醫生作家陳雷，自出世到今有豐富的人生經驗，雖罔踮佇他鄉徛起，不而過，伊ka對故鄉的深情愛戀透過天生的小說家彩筆，一字一字刻劃台灣的身苦病疼。無論是二二八、白色恐怖、環保議題、社會事件，抑是平埔族揣根探源的歷史書寫，佇陳雷的筆尖下底，攏是活靈靈的人間眾生相。特別是書寫Siraya被滅族到走揣認同過程的台語長篇小說《鄉史補記》，被專家學者認為是台語文學的大河小說佮一座路觀牌。陳雷透過小說實踐伊對永遠的故鄉的愛佮支持，比喝一百句愛台灣口號閣較堅定、真實。

關鍵詞：陳　雷、鄉史補記、台語小說、平埔族、Siraya

一、踏話頭：走揣Siraya的根源

　　十九世紀初，ti 台灣縣善化里西堡大內（tsit-mai 台南縣大內鄉大內）附近有一个漢人設防e隘口，內面有 Si-la-iah （Siraya）人作隘丁顧蕃界。

　　Tsia e Si-la-iah 隘丁因為be堪得漢人隘長虐待，thai死隘長逃生。有e向東走入山內，經過茄拔溪來到二社（玉井），又koh 向東liau過楠梓仙溪，來到阿猴廳羅漢內里門（高雄縣美麗鄉pu a寮）。最後pua° 過荖濃溪、中央山脈，去到卑南（台東）。另外幾個向西走，tue灣里溪（曾文溪）來到嘉南平地，ti Si-la-iah 人e原鄉phah拚khia起。

　　《鄉史補記》to是teh寫這幾个Si-la-iah 人家庭kap in e後代ti這個beh 兩百年中間所遇著e事故。In忍受著外來人e壓迫，經過天大地大e變化，流汗流血流目屎，漸漸thuat變，最後成做新e、現代e、咱tsit-mai tak日看會著e台灣人。

　　Tsia-e代誌ti咱家鄉e歷史文獻罕得講過，主要是經過作者四界訪問，ui 鄉親朋友hia口頭探聽來e，算做是正史以外另外補充e資料，ka伊記錄落來，所以暫時叫做《鄉史補記》。（陳雷，2008:21）

頂面所引的這段文字，是小說家陳雷用六冬的時間，費盡心血所完成的27萬字台語長篇小說《鄉史補記》（台南：開朗雜誌，2008）話頭進前的〈《鄉史補記》是teh寫啥？〉。按遮的文字，咱會當清楚了解，陳雷創作《鄉史補記》的起心動念佇佗位？伊欲透過小說家的筆，重建200外冬來Siraya的族群記智。就準講這個族群，數百冬來被漢人透濫、異化、滅族，怹的語言、文化到這當今，強欲消失佇歷史的舞台裡，陳雷嘛欲予怹（in）的囝孫清楚知捌，Siraya人佇這塊土地頂懸所行過的跤跡。無論遮的過往，是痛苦抑是甘甜，攏是咱祖先確實存在過的悲歡離合。

　　Siraya是日治時代人類學家所稱平埔族的其中一個族群。1904年伊能嘉矩的《台灣蕃政志》將平埔族分作十族，是頭一擺有學者為平埔族做學術性的分類，所致，伊能嘉矩會使講是台灣平埔族研究的開創者。1935年小川尚義ka平埔族分作九族，1952年鹿野忠雄閣ka平埔族分作十族（潘英，2001:35）；1990年代了後，專門研究台灣血統的學者沈建德ka平埔族分作九族[1]。Siraya這個族群徛起的所在，大體上是佇現此時的台南縣市、高雄縣市佮屏東縣的部份地區。Siraya族的四大社：新港社、目加溜灣社、蕭壠社、蔴豆社，攏是佇這陣的台南縣境內。Ui遮會當看出，台南縣的確是Siraya的大本營。小說家陳雷的先祖，就是蹛佇永過的蔴豆社。

二、陳雷的小說天命

　　陳雷，本名吳景裕。1939年出世佇中國南京。六歲的時，父母tshua（帶）伊轉來台北市讀西門國校，一直到國校四年轉學到台南市成功國校。續落去，讀台南一中的初中部佮高中部。所致，陳雷的囡仔時代，會使講是佇台南市大漢的。1957年，陳雷離開台南市，去台灣大學醫學系讀冊，1964年卒業了後出國留學。落尾一直蹛佇加拿大，成做一位家庭醫師。

　　大學時代，陳雷捌寫過一寡華語現代詩。毋過，對伊來講，奚（he）只是少年時代的一款文學過渡期所寫的物件。四十外冬後，陳雷安呢看待遐的創作：

　　我感覺tsia-e物件家己讀，做消遣 (entertainment) iah會使，hoo人讀，對讀者無siann好處。除了2-3首用ti《百家春》tsit篇小說內底，tshun--e攏m-bat「見世面」。（陳金順專訪，2008:15）

講著《百家春》（台北：自由時代，1988），這本自1982年寫到1985年才完成，關係二二八的華語長篇小說，是陳雷真正有意識從事文學創作的開頭。《百家春》除了是戰後頭一本二二八長篇小說以外，閣較大的意義，因為它是ui鄉土文學過渡到台語文學的代表性創作。關係《百家春》，研究者施俊州指出作者陳雷的自覺：

文字風格、語言的選擇雖然無超出符碼轉換、鄉土小說文類成規的限定，但是作者的後記〈關於《百家春》的三點交代〉卻表現攸關文學典範改朝換代的自清自覺：台語、客語tsiah是台灣文學的「靈魂」；《百家春》用「中文」寫tsit點是作者一直感覺「遺憾」、「不足」的所在。（施俊州， 2007:229）

因為陳雷對創作語言的自覺，伊真緊就心定掠定，擺脫過去彼種言文無合一、綁跤綁手的書寫筆法。自《百家春》了後，伊的創作全然以伊的母語──台語書寫，一直到這陣，已經超過二十冬[2]。陳雷台語文學的書寫文類，相當多元豐富。包含：小說、劇本、現代詩、散文、評論等。其中，以小說的成就上懸。學者方耀乾認為陳雷的台語小說有下底遮的特點：

其小說語言道地傳神，敘述及剪裁明快通暢，內容廣及台灣政治、社會、經濟、人心的各層面，尤其著重呈現台灣人在殖民統治下受苦扭曲的命運，人道精神濃厚。陳雷的文字在批判中帶有豐厚的情感，一方面指出台灣社會中不公義、非理性一面的真相，另一方面，也不忘在其中發掘出善良人性的光輝。（方耀乾，2005:21）

作家兼評論家宋澤萊認為：陳雷有天才小說家的本質，無需要學習濟濟文學技巧，一落筆就有才調寫出水準以上的作品。宋澤萊閣指出：

他台語的流暢、生動、傳神，這一點沒有那一位台語文學家可以跟他並比。（宋澤萊，1998:49）

另外，陳金順捌將陳雷佮「世界短篇小說之王」Guy de Maupassant（莫泊桑）相比併（phing），稱呼伊是「台語短篇小說之王」（陳金順，2004:191）。最近，佇一篇專訪的話頭，陳金順進一步ka陳雷當作一座「台語小說的路觀牌[3]」。

三、先祖血跡地的人間眾生相

　　陳雷自國校四年到高中卒業進前，一直攏蹛佇台南市。毋過，伊嘛定定轉去麻豆祖厝看伊的阿媽佮阿叔。（楊允言編，1995:117）所致，佇伊創作的小說內底，不時會透濫細漢時陣對麻豆佮台南市的記智。將這兩個所在的人文、地理化做小說的背景。咱代先來看陳雷關係麻豆的書寫。

　　華語長篇小說《百家春》是陳雷有意識寫小說的頭一部作品，這本冊所寫的「是二二八事件以及其後二、三十年間，與事件直接、間接有關連的幾個人物的前後遭遇。」（陳雷，1988:3）關係這本冊的內容，作者佇冊後有交待：

　　百家春的內容雖然以二二八事件以來的台灣社會歷史作枝幹，但是它的實質是一個文學寫作的嘗試，而不是一本記敍性的歷史故事書。作者的本意在以文學藝術的力量來表達兩個簡單的主題：台灣人對國民黨政權的經驗、認識以及對台灣政治前途的期望。（陳雷，1988:157）

Ui頂面這段話，清楚看出陳雷以文學的本位作出發點，知捌小說佮講古的無仝佇佗位。根據靜宜大學碩士生翁瑋珮的研究，《百家春》寫作的素材主要來自五方面[4]。其中第三點，牽涉著陳雷怹（in）阿媽故鄉所發生的上大案件「1950年麻豆案」。這個案件致使濟濟人夆（hong）判死刑佮關禁佇火燒島。當時有一位受難者的家後，每工佇陳雷怹阿媽兜的坅簷（gim-tsinn）跤賣糖仔餅度三頓。這個婦仁人的形象，後來成做《百家春》內面，二二八受難者阿福的牽手阿梅的原型。（翁瑋珮，2004:37-38）

　　往東出了鎮口，接下去一段木麻黃排列整齊的土路。那黃牛拉著阿伯的棺材，不顧掉落滿地的木麻黃的果子，穩穩地踏著黃土路。來到一處稍為高起的小丘地，便是麻豆公墓的地方。（陳雷，1988:137）

　　一會兒，一陣輕輕看不見的和風把銀紙的灰燼吹散了，蝴蝶般地上下飛了幾圈，飄落在墓地的四周圍。這時阿泉記起了阿公交代的幾件事。跟阿梅兩人在新墳前重新坐下，右手袋子裡摸出一個手掌一樣大，光亮的銀盒子，交給阿梅。（陳雷，1988:138）

頂面是《百家春》內底的兩段描寫。Ui這兩段引文，咱聽（thing）好看出陳雷一開始寫小說，就是一位描景寫情的高手，佇勻勻仔進行的節奏當中，陳雷已經「舉重若輕」寫出小說的深沈哀傷氣氛。續落來，咱來看陳雷台語小說內面，有描寫著麻豆的精彩部分，通好予讀者做參考、比較。

　　陳雷的台語中篇小說〈李石頭e古怪病〉，捌予作家陳明仁呵咾是台文小說的超級作品。（陳明仁，1994:14）〈李石頭e古怪病〉是咧寫台灣人認同的問題。佇中國人殖民統治下底，為著生存，漸漸失去家己，失去自信、自尊佮族群的認同，學做中國人的故事。這篇小說發生的背景設定佇麻豆，ui第一章「水堀頭好風水，麻豆鎮出gau人」起鼓。

　　Ti太平無事e時，he溪流親像天頂神明伸出來一隻長長e手，將一塊一塊四角豆腐e水田so hou青青綠綠去，hou人感覺na像是神明為著海島一擺閣一擺e苦難，thiau-kang伸手來ka伊m甘、疼惜。（陳雷，1994:85）

　　Hit陣熱天e麻豆，時常有落西北雨，有時落大就會tan雷公。有一日落大雨，一粒細粒雷公仔子kong著in厝。李石頭peh去厝頂看，嘉哉厝無kong phaiⁿ，kan-na厝頂鳥籠仔內二十幾隻粉鳥hou雷公驚死了了。（陳雷，1994:88）

頂面這兩段〈李石頭e古怪病〉的引文，頭一段作者透過擬人化的筆法，誠巧妙描寫出麻豆的地理環境，有符合現此時當時行的地誌書寫；第二段透過「落西北雨、tan雷公」等自然現象，以「粉鳥hou雷公驚死了了」牽挽出李石頭犯著驚死的症頭，是一段特出的摳（khau）洗筆法。

　　〈阿春無罪〉是一篇探討環保議題的短篇小說，故事的背景嘛設定佇麻豆。「我」是一位自加拿大轉來的醫學博士，佇怹阿叔的診所裡，婦仁人滿仔tshua囡仔來予伊看診。透過診斷佮護士阿英的嘴，才知影原來滿仔怹兜附近有一間農藥廠，怹查某囝阿春是致著農藥中毒。「我」按呢描寫頭一擺見著阿春的印象：

　　伊坐ti椅仔頂，hou老母講gah歹勢。問伊啥物名，伊頭tam落去，細聲應ti嘴內，我等伊頭gia起來，看伊e面，像月光照著e水面，hiah nih清氣kap秀氣。伊今年十歲。我問伊toh位會疼？伊比胸坎，比腹肚，閣比頭殼。（陳雷，1994:62）

了後，「我」去厝邊頭尾探聽才知致著佮阿春仝症頭的囡仔滿滿是。怹向農藥廠抗議，廠方透過烏道佮地方官員硬軟注（tu）盡展，落尾怹自安呢消聲。兩冬後「我」閣轉來麻豆，滿仔趕來診所拜託「我」去怹兜往診。「我」第二擺見著阿春的情景：

    　我toe滿a入去厝內。暗暗e總鋪頂家己一個倒ti hia就是阿春。我peh起lih總鋪。被掀起來看，瘦gah差不多認be出來。單單伊e面頂有以前月光照著e秀氣，kap兩choa tiam-tiam teh流ê目屎。我會認得。伊e腹肚脹水像西瓜hiah大粒，肝已經teng khok khok。（陳雷，1994:66-67）

無論《百家春》、〈李石頭e古怪病〉抑是〈阿春無罪〉；儘管書寫語言、風格、篇章長短全然無仝。陳雷透過伊人道精神的筆，將人間苦難的眾生相，原原本本描寫出來。這毋那（m-na）是麻豆的故事，嘛是全天下間的故事。

四、故鄉台南的地誌書寫

若準講麻豆是陳雷先祖的血跡地，安呢，自細漢蹛到長大成人的台南市，絕對有夠資格通講是陳雷的故鄉。研究者陳慕真指出：陳雷的台語短篇小說，除了文本時間以50年代成做背景以外，相對其他的台語小說來講，陳雷的小說特別有「台南書寫」的特色。（陳慕真：2008:48）

　　 陳雷筆下e台南書寫，包含公園路、上帝廟、台南病院、病院頭前e大溝、公園路口e圖書館、取代圖書館e 7樓百貨公司、石像公園（今湯德章紀念公園）、運河街、sah-ka-li-bah(沙卡里八）…等等，大約攏是ti現在台南市中西區一帶附近，chiah e台南景緻有時ma重複出現ti無kang e小說nih，成做陳雷e小說特有e文本背景，亦hou咱thang看著早期台南市e面貌　　　kap改變。（陳慕真：2008:49）

頂面陳慕真指出的地點，主要出現佇陳雷的〈出國這項代誌──紀念葉豆記先生〉佮〈圖書館e秘密〉這兩篇小說內面。〈出國這項代誌──紀念葉豆記先生〉這篇小說裡，原本「我」一直掠準替二二八受難者湯德章先生收屍的好心人，是佇上帝廟賣粽的甘苦伯仔。落尾，透過一個難得的機會，「我」得著寶貴的資料，才知影替湯德章先生收屍的人，是廟公葉豆記。

　　Hit陣tu好是中晝，日頭當炎，我chhoe著伊e墓，ti一欉大欉玉蘭樹e邊仔。我將hia e粽khng toa甘苦伯仔e墓前，坐toa樹底，鼻著當開e玉蘭花。He真久無鼻著e玉蘭花香味，一時將我出國以來，一直siau念e故鄉一寡代誌，攏帶轉來我e面前。我na像koh看著過身去e阿媽，看著公園路邊koan大e鹽桑樹，kap心愛e小小圖書館，kap賣粽e老阿伯……。（陳雷，1994:37）

1990年代中期，筆者頭擺讀著〈出國這項代誌──紀念葉豆記先生〉的時，捌將這篇小說當作散文看待，這除了是個人一時的錯誤解讀以外，嘛通看出陳雷出入真實散文佮虛構小說文本之間的自然功力，頂面這段引文就是上好的證據。〈圖書館e秘密〉這篇三千統字的小說，是咧描寫國民黨的特務，無所不至的監視系統，利用圖書館的借冊單，陷害善良的人民，製造「匪諜」佮「思想犯」的過程。佳哉，一位勇敢閣有良心的圖書館員麗娟，為著友情佮若有若無的愛情，將敏雄借禁冊的冊單藏起來，使致敏雄佮伊的朋友逃過這個劫數。

　　同時ti這條暗暗e運河街，已經有戀愛e少年家teh散步，近近hit旁風若透，就有臭chho e魚a味吹過來，雖然in攏真慣si這個味，ma是借這個機會，身軀oa khah近去，伊e手牽伊e手，成作畫圖家畫出來e運河夜景e一部份，……。我家己先轉來，想講he借冊e代誌按呢就會解決ah。（陳雷，1995:113）

　　佳哉麗娟ka hia e條a另外藏起來，無交出去，昨hng才攏總theh出來還敏雄。呵無雞母喂，這幾張條a若hou in sa去，呵現現白紙寫烏字，夭壽beh會活？……續落我有想著，最近我ma有借Tolstoy kap Tugenev e小說，in是蘇聯共產國家e作者……lu想lu無妥當，心肝頭toe leh pok-pok siak。（陳雷，1995:114）

另外，佮〈圖書館e秘密〉仝款書寫白色恐怖的短篇小說〈起siau花〉，嘛是「台南書寫」的一篇典型之作。篇內出現鴨母寮菜市仔、成功國校、台南一中，遮的陳雷生活裡四箍笠仔的地誌書寫。〈起siau花〉是咧描寫台南一中校工萬斤，受老芋仔教官陷害講是「匪諜」，直接予人掠去警備總部，煞尾怹某招仔起痟（siau）放火殺死家己的故事。

　　初初開始抹粉hit cham，無人瞭解伊抹粉e心情kap背景，顛倒o-lo伊sui，其實就是伊開始起siau e現象。而且土心有看見，招仔每日早起時，拖木屐出門去挽花。Ti離市仔無外遠e路邊就有這款花，挽一大把轉來。Ti頭殼頂插花，用真che時間排做無仝e花樣kap色彩，kap胭脂面e色相對配，親像一sian ou-lin-gio……。（陳雷，1995:48）

　　招仔e厝燒了後，真久無閣重起。隔一年，he空地發出一片旺旺密密e小花，大簇細簇，無仝款e色彩。過路人無叫伊做「春仔花」，攏叫做「起siau花」，非常妖嬌豔麗，連續幾若年。（陳雷，1995:50）

陳雷是一位gau描寫心理層面的小說高手，ui頂面「招仔」起痟過程的鋪排就會當看出伊高超的手路。

    針對陳雷所寫的二二八小說《百家春》、〈出國這項代誌──紀念葉豆記先生〉，國立台北師範學院碩士生陳瑤玲，雖罔認為台灣現此時是毋是佇「後殖民」的階段，猶閣存在爭議。毋過，伊認為陳雷的小說有一個真大的企圖：

　　希冀把台灣人受壓抑的記憶釋放出來，召喚台灣人的歷史記憶來建構台灣人的台灣意識，從而恢復台灣人的身分。（陳瑤玲，2005:31）

五、平民的苦難、歷史的傷痕：二二八佮白色恐怖

　　陳雷的台語小說，除去先祖血跡地的人間眾生相參故鄉的地誌書寫，閣一項誠大的特色，就是描寫：平民的苦難、歷史的傷痕。特別是佇「二二八」佮「白色恐怖」這兩個影響戰後台灣歷史發展非常重大的事件頂頭，陳雷發揮伊小說家的春秋之筆，刻劃出佇外來政權殖民統治下底，台灣人民被無情草踏的一幕閣一幕悲劇。

　　關係陳雷所寫的二二八台語小說，除去頂面講著的〈出國這項代誌──紀念葉豆記先生〉。咱下底欲探討的〈The unspeakable〉[5]、〈Thai狗〉[6]這兩篇嘛誠有代表性。看著〈The unspeakable〉這個題目，千萬毋通掠準陳雷寫二二八英語小說，會號這個題目，是有原因的：

　　英語「unspeakable」有「be曉講」、「be使講」kap「可怕講be出嘴」e意思，想無適當e台語詞，暫時用英語名[7]。

〈The unspeakable〉這篇小說是咧講雄仔12歲的時，有一暝怹老爸he痀（ku）喘夯（gia）起來，怹老母叫伊出門揣醫生來厝裡往診。雄仔佇甘蔗園親目睭看著醫生陳寅佮另外一個台灣人，予外省兵仔銃殺的過程。雄仔轉去厝裡對老母講起遮的經過，怹老母現出驚惶、恐怖的表情，叫伊咒咀絕對袂使講出去。彼暝，因為叫無陳寅先生，怹老爸自安呢做身去。

　　Ah，be使講，che攏總be使講，chit-ma咱知影in ti toh位，ma be使講，不管ti蟋蟀a鬧熱e甘蔗園，ti黃昏無人所到e墓a埔，chia e可怕e，m知beh按怎講出嘴e代誌，ai koh等候到tiang時才會tang攏總講出來？（陳雷，2001:58）

〈Thai狗〉這篇捌分別發表佇《台文通訊》[8]佮《台文戰線》[9]的小說。仝款透過一個囡仔人的目睭，來講佇七堵發生的二二八慘案。《2006台語文學選》的主編施俊州按呢看待這篇小說：

　　〈Thai狗〉的寓言性主要藉gin-a的觀想來呈現228事件的殘酷（烏色）；透過gin-a的目睭，thai人、thai狗之間取得一種親像因果又koh m是因果的換喻（metonymic）關係，「戒嚴」、「開會」、「自治」的歷史概念ma ti仝一個修辭關係當中tai著笑詼（humor）諷刺的色彩。（施俊州，2007:233）

〈Thai狗〉嘛參〈The unspeakable〉相像，小說本文的尾後攏有一段趣味的【註】。關係這段【註】，陳雷佇接受訪問的時，透露這個趣味的經過：

　　Teh寫〈Thai狗〉e時，tu好收tioh鄭雅怡e批，講伊有飼2隻狗，叫做烏嘴--e kap阿財。我感覺tsit 2隻狗a名真好。拜託伊徵求阿財kap烏嘴--e同意，hoo我ti小說內底借用in-e名。所以ti尾a加1句感謝e話，表示對in e尊敬，因為狗kap人仝款，有生命、有尊嚴，攏ai受尊重。咱tioh-ai培養tsit個習慣，an-ne tsiah be像中國兵thai人na thai狗。（陳金順專訪，2008:23）

佇頂面「故鄉台南的地誌書寫」，有紹介陳雷的兩篇白色恐怖小說〈圖書館e秘密〉佮〈起siau花〉。續落來，咱欲閣紹介另外兩篇白色恐怖小說〈美麗e樟腦林〉佮〈大頭兵黃明良〉。以上四篇捌同齊予宋澤萊選入《台語小說精選卷》（台北：前衛，1998）。宋澤萊認為這四篇小說，就文体的風格來講，是運用寫實派的技巧。就陳雷所描寫的人物佮背景來講，接近ui寫實派所演變出來的「表現主義」色彩。（宋澤萊，1998:48）

　　〈美麗e樟腦林〉是陳雷所寫的頭一篇台語小說，1986年完稿，1987年9月發表佇美國出刊的《台灣文化》第十三期。這篇小說描寫台大卒業的阿澤，做兵的時予人派去阿里山森林管理實驗場做管理員。管理組下底五、六個老芋仔會偷剉樟腦林。阿澤發現這件代誌了後，按算寫報告予閻所長，無想著閻所長佮怹是仝掛的。怹聯手密告陷害阿澤，結局阿澤夆（hong）以「共產份子」的罪名判五年有期徒刑。阿澤坐監猶未一冬，規大遍百年的美麗樟腦林就予人剉了了。

　　He樟腦樹葉頂面一ian薄薄e霜，hou日頭照咧就無去啊。葉仔頂青青，像玉仔面。阿澤看he細欉樟腦樹e芽，發到chiau chiau是，就toa簿仔頂做一個記號，koh鼻he葉仔發出來e味，就koh toa簿仔頂拍一個圓khou仔。（陳雷，1994:28-29）

　　山脚近小路所在e樟腦林已經hou人chho一片光光，猶有一寡大樹倒ti hia，猶未搬走。阿澤看看咧，chho去e所在大概有二十幾甲，確定是有人teh偷林。詳細e狀況記toa簿仔內，趕緊沿路行轉來實驗所。（陳雷，1994:28-29）

〈美麗e樟腦林〉是陳雷實踐台文漢羅合寫的開始，22冬來，伊一直攏無改變這個大原則。嘛因為陳雷按照這個利便的原則，使致到這陣為止，伊已經寫出數十萬字的台語小說。〈美麗e樟腦林〉佇1994年2月收入《永遠e故鄉》的時，陳雷佇篇頭有一段「作者註」，說明伊漢羅合寫的起心動念：

　　台灣的文學創作一向不是以台語，而是以非台語（日文或中文）為主，因此台灣文學可說是一個半翻譯性或翻譯性的文學，要求台灣文學進一步的發展，必須要提倡台語的寫作及閱讀。〈美麗e樟腦林〉是以台語拼音法及台語發音的漢字併用寫成的。這種方法對於目前有中文基礎的台語文字的初學者，也許是一個比較容易的入門。（陳雷，1994:26）

〈大頭兵黃明良〉是一篇書寫1958年八二三砲戰，一個台灣充員兵仔慘死的故事。宋澤萊捌運用Hayden White（海登．懷特）佮Stephen Greenblatt（格林布拉特）的新歷史主義文學理論，來分析陳雷的〈大頭兵黃明良〉佮朱西寧的《八二三注》，佇內容、修辭方面的重大差別，以及怹分別對所謂「本省人」佮「外省人」族群的創傷治療。（宋澤萊，2007:59-109）

　　新歷史主義批評的一個很重要的認識前提，就是它把文學看成是歷史現實與社會意識形態的交匯處。包括馬克思主義文學批評在內的傳統的歷史批評，都十分重視歷史現實在文學中的反映，然而社會意識形態在這個反映過程中究竟產生一個什麼樣的作用，傳統的歷史主義批評卻不予深究，甚至不認為這是一個需要探討、反思的問題。（盛寧，1998:26-27）

宋澤萊的論文雖罔嚴厲批判朱西寧的《八二三注》是一本由「謊話和神話」構成的小說。同時伊嘛批評陳雷〈大頭兵黃明良〉這篇小說裡，「外省」連長無顧人命，銃殺班長、逼充員兵仔赴死的情節，有較譀（ham）古淡薄。（宋澤萊，2007:59）

　　做穡人e阿良hou hit個佔領台灣e中國兵王連長命令，行出去碉堡，na像行入去落西北雨e田裡，he大炮像雷公sin nah，一聲遠一聲近，tan無停。伊行出去tu好四分鐘e時，來到車路彎出去e所在，一粒炮彈按金門對面飛來，toa伊e頭殼頂爆炸。He時常叫咱台灣人做親愛e骨肉同胞e中國人，ti八月三十一日早時八點十五分，放一粒炮彈，將大頭兵黃明良炸一下連身屍攏無去。（陳雷，1994:45）

讀完頂面這段〈大頭兵黃明良〉的描寫，佮ui戰後國民黨政權佔領台灣了後的所做所為成做判斷基礎。筆者認為宋澤萊對朱西寧《八二三注》的嚴厲批判的確有道理，ah若針對陳雷〈大頭兵黃明良〉的批評，筆者徛（khia）在無同意的立場。也就是本人認為以上對〈大頭兵黃明良〉的描寫，佇彼個時空是誠有可能發生的代誌，一點仔都無需要大驚小怪。

六、代結論：平埔再現，建構鄉史

    陳雷長期以來透過小說的創作形式，喚醒被外來統治者殖民數百冬的台灣人民，是伊成做一位有使命感的文學家所展現出來的正義呼聲。下底咱欲閣倒轉來探討這篇論文的開頭所講著的27萬字台語長篇小說《鄉史補記》。

　　《鄉史補記》是ui平埔si-la-iah人e角度來展現台灣人e歷史。這是伊khah特別e所在。Tue tsit條歷史e溪流，看tioh平埔si-la-iah人an-tsuann對應外來漢人愈來愈大e壓迫，an-tsuann漸漸失去in e名字、語言、文化，最後失去族群e認同，kiong-beh ui台灣e歷史完全消失。（陳金順專訪， 2008:35）

陳雷的《鄉史補記》猶未正式出版進前，就有鄭雅怡的〈《鄉史補記》去殖民及去漢的歷史詮釋〉（鄭雅怡，2005:247-272）、〈十字架、百合及尾iah──《鄉史補記》中tui受難重頭生e去殖民精神〉（鄭雅怡，2007:4-1～4-36）以及李勤岸〈平埔族主体性論述e重現：以陳雷e長篇小說《鄉史補記》做例〉[10]等單篇學術論文發表。甚至鄭雅怡的碩士論文《陳雷台語作品e去殖民精神──用《鄉史補記》做中心》（台南：成功大學，2008.6），嘛是以《鄉史補記》做為研究對象。Ui遮咱會當看出《鄉史補記》佇台語文學史上的地位佮它的重要性。

陳瑤玲佇伊的碩士論文裡，根據葉石濤、鍾肇政、楊照等人的講法，認定陳雷的《鄉史補記》有幾落項「大河小說」的特點。（陳瑤玲，2005:39-40）伊的指導教授李勤岸嘛認同這款看法。（李勤岸，2008:3）李勤岸佇伊論文的結論指出：陳雷的《鄉史補記》顛覆台灣文學主流論述中的中文書寫、漢字書寫、漢人史觀佮漢人男性中心的價值觀，重建一個以Siraya女性意識為中心的平埔族主体意識，將台灣人欲達成建國的去殖民、去漢佮去中國，用小說的形式重建出來（李勤岸，2008:18）。李勤岸進一步表示：

陳雷e小說寫到《鄉史補記》會使講已經相當成熟，展現出大河小說e大作家氣勢，成就並無輸同時代e華語小說家，嘛有可能已經超越ah。可惜，現此時華語控制之下e台灣文學界猶未對伊注目重視，這對陳雷，對台語文學攏是非常無公平e，嘛暴露出台灣文學e研究有伊見識淺薄kap局限e所在。換另外一个角度來看，台語文學taⁿ已經出現大作家，台灣文學e研究空間算是非常曠闊lah。（李勤岸，2008:18-19）

關係李勤岸頂面對陳雷參《鄉史補記》的評價，筆者基本的（tik）採取認同佮肯定的態度。我欲強調的是：佇族群認同的過程中，以台語文學來建構平埔認同，有伊現實上的無奈。總講一句，陳雷透過《鄉史補記》的書寫，重現Siraya族兩百外冬來的遷徙、被漢化、自我認同的過程，佇台語文學經典化的路途頂懸，已經扮演真誠重要的角色。另外，《鄉史補記》佇南瀛文學的書寫佮建構方面，嘛會使講是立下一件大功勞。未來，伊的重要性將會一日一日增加。

阿Sui媽母少年人勇，無停行到天--裡hua°-hua° e月無--去，猶未phah-phu-光，tu好來到一tah ke-ke e khut-a地，路也無--去，頭前一大片長草，插插插e水燭，比人khah kuan，……。阿Sui媽母kui暝顧走無hioh睏，驚koh iau-so，suah去動著囡a胎，雄雄pak肚痛beh生。用爬--e nng入長草內面。Ka草ian倒，ku tua hia m敢哀。He草--裡e惡蠓i°-i° ¬°-¬°，kui kun若雨水teh tsang，無停ka伊釘。……。雄雄伊聽著ua--一下一聲，伸手去草--裡摸，滑溜溜一个嬰a。He嬰a蠓釘大聲khau，水地e田kap-a，聽著嬰a khau，也to koh叫，……，一陣（tin）tue一陣吼。伊驚ba-a來，驚蛇來，嬰a抱--起來，用溼地e水ka嬰a洗身軀。也tshue著一欉姑婆芋，ban芋葉來抱嬰a，用長草ka嬰a pak好，ai° tua腰--裡koh行。（陳雷，2008:131-132）

頂面這段《鄉史補記》的小說片段，是咧描寫Siraya少女阿Sui媽母（本名Mabutirat）予漢人巡檢欺負有身，脫逃佇野地裡生囝的經過。雖罔陳雷是咧書寫兩百外冬前的代誌，不而過，透過伊生動的彩筆，咱可比看著一段真實的畫面佇咱目睭前搬演。話講倒轉來，ui頂面的描寫咱會當清楚看出兩百外冬前，咱的先祖Siraya的婦仁人勇敢、有自我意識的一面。換一句二十世紀尾時行的學術用語，就是展現「女性主義」。其實，書寫Siraya少女阿Sui媽母的悲慘遭遇雖罔是小敍事，毋過，筆者認為這是陳雷暗藏大敍述民族寓言的高段手路。透過Siraya少女的經歷，隱喻台灣人被外來政權殖民統治的悲哀。

　　透過陳雷的台語長篇小說《鄉史補記》，咱佇過往的歷史時空裡，參Siraya美麗相會。向望咱的囝囝孫孫，毋通袂記家己身軀頂透濫著Siraya的血。

參考冊目