2009-08-24 00:50:25wagi-sun

Morakot志工七日記(之6)

6.林邊心情

  這世人頭擺來林邊是食海產、買蓮霧,是為著無情的Morakot害林邊淹水淹kah滿流直界。下晡3點半,欲離開服務2工的徛家彼時,我對主人講:向望後回到林邊是來tshit-thôm̄好閣來救災。

  聽講這tah是林邊地勢上界低的所在。媽祖廟好砌佇邊仔,媽祖婆仔敢無鬥保庇?人講「亦tio̍h神、亦tio̍h人」,水災雖罔是天拍天tshiânn,大自然強猛的khùi力,m̄是任何人會當阻擋的,不而過,每擺天災地變所造成的破害一擺phīng一擺閣khah重,敢講攏無半點人為的因素在內?

  媽祖廟邊iáu會當看著1間正身護龍的紅瓦厝。時代無情,這款古早厝現此時已經oh得見,頭擺參伊相會,suah看著伊的門口埕予1沿看無深底的路糊仔糜嵌牢牢,好佳哉有山貓thìng好來來回回1日車數十tsūa路糊仔糜,予紅瓦厝的門口埕ta̍uh-ta̍uh-á恢復伊原底的樣相。我想,設使你問駛山貓的ún-tsiàng到底ài閣幾工才清會離,減采伊會hàinn頭問天。

  佇林邊街仔,你會看著跤踏車、Oo-tóo-báiThoo-la-khuh、兵仔車佮各種運送人員、物資的車,來來去去潦過退袂離的垃圾水佮路糊仔糜,規工無歇。中晝食飯的時,坐佇農藥店隔壁鐵門thuah落來的店口,無幾分鐘就看見1Oo-tóo-bái潦水熄火的畫面,苦主知是欲哭抑欲笑?咱的雙跤lap佇路糊仔糜裡,這個時陣hūan勢才有法度體會受災戶的心情,咱的同理心mā佇這個時陣ta̍uh-ta̍uh-á ùi心肝底puh-ínn

  向望後回來林邊thìng好看著鄉親喙笑目笑、身體康健無煩惱。

 

──2009.8.23寫佇流目屎的土地

 

文平 2009-08-24 15:26:52

金順這幾工的日子一定過了誠充實。真見笑,hit工講欲去佳冬、林仔邊鬥相共,無疑誤主辦單位喝停,煞去無成。
下一擺,等一切平靜,咱逐家會當相招來去林仔邊「水月軒」食檸檬蝦。
向望早日回復,台灣加油。