台灣ｅ孫中山，孫中山伊罕咧來台灣
噶瑪蘭ｅ子弟，置大稻埕太平町專治
內科、小兒科、花柳科，醫學無發達
一甲子後才驗出伊嘸是中國人，春風
得意樓，得意春風人來客去，衲袋仔
飽飽，台灣文化協會，協調左派右派
報紙愛加減讀，民眾青瞑牛成群結黨
西來庵ｅ頭人槍下亡魂，東京留學生
教乖街頭罔散步，台灣青年順勢出世
治警事件內籬仔留學，四個外月讀破
二百本冊，鱸鰻頭向文化頭抌頭行禮
演講債愈疊愈懸，文化書局展覽文化
第一憨種甘蔗予會社磅，二林做穡人
無欲做三等國民，農民組合佮四跤仔
大戰五回合，咱來喝一聲口號：團結
真有力！茲些憨子弟咁真正會團結？
阿片許可，二萬五千人排隊領牌，令
十七歲少年家暗時發電報，國際聯盟
透早就出門，蕃薯地天色漸漸拍潽光
霧社ｅ霧佔領公學校運動埕，飛凌機
飛過人道主義ｅ界線，毒瓦斯四界掖
人生自古誰無死！十年若一日ｅ堅持
喚醒五千人相送，歷史地位隨人解讀
峙置紅架桌頂，嘸值你開ｅ一帖藥方

＜後記＞詩誌台灣先覺者蔣渭水(1891-1931)。

──2006.8.15寫置埔姜頭