二十世紀拄起磅，半線車頭前土地公廟邊
謝家做苦勞ｅ老父、替阿本仔洗衫ｅ老母
滿腹映望成空，註生娘娘一時失注意
兩男兩女做前，第三查甫囝假女出世
註該雨夜花菜籽仔命，賣身葬母大墩做奴才
甘蔗園ｅ蔗葉仔綴酸風ｅ旋律陪伊唱哭調仔
頭汴坑山頂剉柴日日披星戴月二十舖路
吊橋跤大石頂目屎準飯吞，暗夜偷走厝
亂石堆中揣死神跳恰恰，鬼門關前踅一輦
東勢做張桑後岫兄嫂牽線，十七歲ｅ身命帶滄桑起帆

一九一九年開正，張桑chua路離鄉火車直駛雞籠
港口郵輪起錠日本神戶，十八歲ｅ眼界異國齊開
生理人米糧囤厝間，散鄉人行動實踐左派，伊
目睭金金看，革命種籽埋入心肝窟仔等待他日莩穎
經營之神無助張桑一臂之力，遠走青島猶原拖屎連
留伊孤人暫蹛單獨回鄉，支那北爿反帝若野火生湠
露西亞十月ｅ革命風位西伯利亞直迵蒙古沙漠吹來
嘸驚風寒霜凍雨水冷，雪中紅花腰肢徛挺挺
伊嘸願永世細姨仔命，伐過大戶漚爛ｅ舊戶碇
西米羅、ne-gut-dai、自轉車，大墩街路走拋拋
前衛ｅ模麗女打扮嘸捌字ｅ小女子，一陣蝶仔鼻芳偎花欉
林獻堂、楊肇嘉目光射出欣慕，透露文化人交陪ｅ美意

一九二三年駛向上海ｅ船班，三少年參兩翁某仝船同渡
歷史洪流沖出難料ｅ航路，木順歸尾綴前綴後舞革命
六月初七恥政紀念日伊用嘴嫷贏百外個噗仔聲
商務印書館印證女性ｅ本領，出頭天猶在未定之天
一九二五年夏秋之交，木順做橋枋支那共產黨開門窗
國際局勢勝過捲螺仔風，嘸捌字ｅ新媳仔綴潮流翻身
東方大學鍛鍊思想筋骨，白雪雪ｅ大地滋養曠闊視野
一九二七年九月功夫出師，福爾摩莎ｅ黎明近在天邊
莫斯科ｅ秋風冷透衫裾，西伯利亞鐵枝路一路依依難捨
惜別港口海參崴、神戶、上海，上野公園邊黨章初胚現

一九二八年四月十五日，台灣共產黨離土法租界出世
翁澤生濟柱地基徛在，雪紅意外落馬候補中央委員
十日後天拍潽光巡查青狂掠人，雪紅五人受掠解送台灣
木順洶狂脫走留總頭，讀書會事件演變驗明正身
北監獄內五人仝一嘴拍死嘸認，官廳無怹法放牛食草
國際書局看板高掛，雪紅手術農民組合、新文協神經線
左派書刊顧思想根本，克煌捍冊店培養內在元氣
一九三一年台共走互大人掠，日本高氣壓隨時降臨
雪紅獄中取經十三年，自白書轉向一生污點
北監留學九冬偆一喟絲太平隱居，頭汴坑麻雀出聲掩護

狗去豬來大華酒家裝門面，敗戰飛機化廢鐵趁一斗
二二八怒火湠遍大墩城，三月初二台中戲院人馬會齊
克煌徛頭陣佈局女豪傑現身，仕紳秀才造反十年袂成
廿一師登陸軟跤蝦講通和，雪紅箍群英干城立誓揠暴政
二七部隊名聲透頂港，國民黨軍大墩城假意槍下留人
雪紅下令埔里轉進原住民，十七冬前霧社驚破膽嘸敢相拱
烏牛欄青年軍決意死戰，兩姓頭人相chua走怨氣沖天
官府賞金十萬欲挃雪紅首級，左營海軍相助廈門偷渡成

支那共產點油做記號食人夠夠，左派標頭硬掛右派狗牌
紅衛兵食無三把應菜欺人太甚，遊街示眾強壓雙跤跪地
永遠嘸抌頭ｅ女革命家魂歸異邦心向永遠ｅ島鄉
可比雨夜花受風雨吹落地，花謝落土不再回！

〔後記〕詩誌台灣第一位女革命家謝雪紅(1901-1979)。

──2006.2.3寫置枋橋街