日治時代尾期，一寡思想先進ｅ藝文人士，定定置詹天馬開ｅ咖啡店「天馬茶房」開講、破讀，彼陣當咧時行新劇，有一團新劇團嘛庶常置茶房內底咧排練、搬演。
　　劇團ｅ大柱阿玉是一位新時代ｅ嫷姑娘仔，置遐，伊佮拄位日本學音樂轉來ｅ少年家阿進仔，一見面就剎(saNh)著頂八卦，雙人互相有意愛；嘸過，阿玉ｅ老父「海龍王」干單想欲給伊匹配予醫生仔囝仁昌。
　　阿玉、阿進兩人置劇團排練、唱歌唸曲，當阿進咧彈吉他，聲音陣陣響起，阿玉隨唱彼條「滿面春風」：「......又閣一日，佮伊行入一間小茶房，雙人對坐滿面春風，咖啡味清芳；彼時伊也對阮講起，結婚ｅ事項，互阮一時想著歹勢，見笑面遂紅。......」；第二次世界大戰結束，日本戰敗，台灣被中國接收，劇團為著慶祝回歸「祖國」，準備編排新戲齣，阿進佮阿玉鬥陣創作新歌「幸福進行曲」，當怹唱著：「......你講你欲唱一首歌，幸福進行曲，這是阮為你唱ｅ一首歌，日子隨風吹，一生只愛你一個，春夏秋冬我無你怎樣過。......」；雙人那唱那使目尾，逗逗沈醉置愛河內，雖罔時勢真無穩定，怹嘛全心享受一目睨仔就消失形影ｅ幸福。
　　就置阿玉佮阿進雙人愛甲糖甘蜜甜ｅ坎站，阿玉ｅ老父「海龍王」已經佮謝醫師參詳好勢，欲互阿玉佮仁昌置二月二八彼工，作一睏備辦訂婚、結婚ｅ喜宴；二月二七彼工欲暗仔，專賣局派來掠私薰ｅ人員，來到「天馬茶房」門跤口，抄著賣薰ｅ婦仁人阿邁仔咧賣外國薰，就用槍柄給撞倒置塗跤兜，彼陣，邊仔ｅ民眾看著中國官為非糝(sam2)做，逐家拳頭母掟按(deN7 an5)按欲佮怹撦拚，置人聲喊喝中，官員開槍彈死一個民眾，眾人嘸放怹干休，結局引起『二二八事件』；另外一爿面，阿玉包袱仔款好，來到事先參阿進約束相掣走ｅ碼頭等愛人，即跤兜，中國兵仔來到當咧搬演新劇ｅ戲台，戲台頂拄好咧唱「幸福進行曲」，即時，掣頭ｅ軍官開槍，彈著連鞭欲佮阿玉作夥走揣幸福ｅ阿進，嘸過，癡情ｅ阿玉猶原置碼頭憨憨仔等？
　　續落，真短ｅ時間內，『二二八』ｅ消息傳遍全島，逐所在相連續產生抗暴ｅ行動，『二二八事件』ｅ怒火歸個湠開，成做『二二八事變』；即擺台灣歷史上，上界慘烈ｅ抗暴行動，受著無情鎮壓，深深影響台灣人半世紀以來ｅ生活佮文化。
　　頂頭所寫，是林正盛導演ｅ電影『天馬茶房』ｅ劇情故事，即齣電影是以『二二八』彼個年代做背景，重點囥咧描寫彼時代少年男女ｅ純情愛戀，佮智識份子ｅ生活思想；雖罔電影無直接歙出寫實ｅ抗暴場面，嘸過位影片內底，咱看著少年男女追求自由戀愛，智識份子為理想付出熱情，茲ｅ人文內涵，攏是彼個純情年代留予咱ｅ寶貝。

──2000.3.8寫置枋橋街
　　2000.3.30《島鄉台語文學》第17號
　　2005.10.27修訂