中晝時鐘摃十二下
　　　彼跤兜
　　　我位地下一樓摜兩罐冰涼
　　　ｅ百香綠茶
　　　來到妳徛ｅ第二座
　　　收銀台面頭前
　　　我將彼兩罐妳講誠好飲
　　　ｅ百香綠茶
　　　囥踮收銀台頂懸
　　　妳用熟練ｅ跤手　刷
　　　彼兩罐百香綠茶ｅ條碼
　　　收銀機頂頭隨浮出28
　　　ｅ數字
　　　我將三十箍拄予妳
　　　妳找我兩箍閣置百香綠茶ｅ紙盒仔頂
　　　頓兩個紅色ｅ圓印仔

　　　即時
　　　徛置穿紅色短裌仔ｅ我
　　　ｅ後壁面
　　　猶有兩、三個人客咧排列
　　　雖然嘸是妳腹肚內ｅ蝒蟲
　　　我嘛知影妳定著
　　　枵甲大腸告小腸
　　　妳無歹面相看
　　　顛倒展開一向春天ｅ笑容
　　　對待每一位踏跤到ｅ顧客
　　　嘸管伊是買鹽、買米
　　　買一盒十箍銀ｅ雞卵
　　　抑是買咱愛飲ｅ
　　　百香綠茶
　　　妳照常嘴笑目笑

　　　我趕緊退到後爿
　　　手摜彼兩罐百香綠茶
　　　五秒鐘了後
　　　我將進前寫好ｅ字條仔
　　　佮一罐百香綠茶
　　　交予妳無閒chih chah ｅ
　　　倒手
　　　妳對我笑微微
　　　講一聲「好」
　　　我歡頭喜面行落阮地下一樓
　　　準備食中晝頓

　　　暗時下班轉到厝
　　　我坐置燠歙ｅ房間內底ｅ
　　　椅仔頂看一份十箍
　　　有淡薄仔台灣味ｅ報紙
　　　誰知看無五分鐘愛睏神就來相揣
　　　直欲九點我洶洶醒起來
　　　進入手機仔內底ｅ電話簿
　　　用倒手ｅ踵頭拇
　　　揣出妳足有鄉土喟口ｅ名字
　　　我躊躇三秒鐘
　　　然後將電波發射出去
　　　頭一bai2妳ｅ手機仔當咧通話中
　　　我掛掉電話
　　　繼續看報紙頂頭
　　　阿扁仔佮戽斗輝仔手牽手
　　　鬥陣參加北社成立大會
　　　ｅ新聞

　　　十五分鐘了後
　　　第二bai2對妳ｅ手機仔發射電波
　　　喨三聲
　　　袂輸已經等待三me5三日
　　　ｅ坎站
　　　聽著妳熟似甲有偆ｅ聲音
　　　頇慢講話ｅ我用笑聲回應妳
　　　妳笑笑講我心情袂嫫比妳卡歡喜
　　　有真濟話想欲對妳講可是袂赴市
　　　無跤　無翅ｅ時間　無情ｅ溜辿
　　　才講十四分外恁兜ｅ電話隨喨喨叫
　　　我知影恁ma-jih ｅ欲揣妳
　　　妳用小可溫純ｅ聲
　　　喚我後畷閣敲予妳
　　　千言萬語猶原機關囥踮倉庫
　　　上無　至少　咱已經約定六月火燒埔ｅ
　　　最後一工　欲三個人作伙出去蹉跎
　　　映望即回妳嘸通臨時有代誌

　　　中晝彼罐百香綠茶
　　　嘸知妳飲了抑未？

　　　－－2001.6.19寫置枋橋街
　　　　　2001.12.15《台灣ｅ文藝》第4期