想妳　置鹿港媽祖宮口
　　　恬靜ｅ暗暝　拄佮
　　　三位文學好友　踮
　　　無真善美ｅ真善美KTV　唱煞
　　　一首一首淒美ｅ　情歌
　　　昨日　頭擺欣賞妳ｅ歌聲
　　　He是　請恁食牛排
　　　ｅ時　妳洶洶出招ｅ
　　　誠意　踮枋橋夜市邊仔ｅ
　　　KTV內底　歸暝
　　　攏妳ｅ笑聲

　　　仝款暗頭仔　佮
　　　兩家伙仔　攏總
　　　六個大人　四個囡仔
　　　踮鹿港街仔ｅ
　　　牛排館　食暗
　　　參咱平平姓陳　大我一歲ｅ
　　　師母　提說男女之間
　　　鬥陣ｅ鋩角　我隨想著
　　　伊佮老師　增差十三歲　雙人ｅ
　　　愛情故事　互我欣慕

　　　我提彼張　明星相片
　　　予師母看　伊講妳
　　　真嫷

　　　昨暝　L用淡薄仔沈重ｅ口氣
　　　給我講　妳置草地故鄉ｅ
　　　阿公　拄仔過身
　　　妳ｅ心情　諒必
　　　親像無底深坑　一直
　　　墜落．．．

　　　我趕緊　寫一封
　　　掛心ｅ批信　拜託L
　　　無論安怎　親手交予妳
　　　置月影照落ｅ
　　　KTV埕園　透過南北兩地ｅ
　　　手機仔　我知影批信
　　　猶未　到妳手頭

　　　前暗11點外　為著島鄉
　　　寄送ｅ事項　咱置停車ｅ所在
　　　講細聲話　遂引起　L無歡喜
　　　隔轉工透早　接著妳
　　　著急ｅ電話　妳真驚
　　　閣一擺　拍歹姊妹仔情

　　　如今　恁兩人無風無湧
　　　嘸過　猶置鹿港媽祖宮
　　　香客大樓房間底　ｅ我
　　　轉去北地了後　嘸知
　　　欲安怎　面對多愁善感
　　　ｅ妳

　　　－－2002.1.15寫置枋橋街
　　　　　2002.8《海翁台語文學》第10期　
　　　　　2005.3.17修定