去冬山河耍水ｅ
　　　隔轉工透早
　　　佮昨昏仝款
　　　猶未五點就起床
　　　這是咱頭擺同齊
　　　出外　蹉跎

　　　即世人　罕得去遊樂園
　　　嘸過彼一日　關西
　　　六福村ｅ日頭
　　　展開伊光燦燦ｅ笑容
　　　迎接咱

　　　我嘸甘妳　白皰皰ｅ皮膚
　　　互日頭曝甲烏暗眩
　　　位揹仔夯出彼枝
　　　昔日為妳遮雨ｅ
　　　綠角花仔小雨傘
　　　來擋日頭

　　　茲有濟濟冒險　刺激ｅ
　　　蹉跎物仔　
　　　名攏號甲軂軂長
　　　袂輸阿拉伯世界ｅ
　　　天方夜譚
　　　我已經袂記了了

　　　總是彼下晡
　　　透中晝　食飽無偌久
　　　咱作伙坐海賊船ｅ
　　　情　景
　　　我永遠記椆椆

　　　彼隻海賊船　置天頂ｅ
　　　藍色大海　搖來搖去ｅ
　　　時陣
　　　無定妳佮我相款　嘸敢
　　　擘開重巡ｅ目睭
　　　干單　綴眾人咻咻叫

　　　海賊船　逗　逗　仔　靠岸
　　　位雲頂
　　　腹肚內ｅ物件　相爭欲
　　　闖出來
　　　我忍袂椆　互坐置倒手爿ｅ
　　　妳牽出來

　　　隔轉工
　　　聽講公司內底出現
　　　即馬當時行ｅ
　　　狗仔隊
　　　四界風聲謗影
　　　咱無代無誌變做
　　　掛頭牌ｅ主角

　　　落尾　聽講妳足受氣
　　　心情親像　雲霄飛車
　　　位懸懸ｅ天頂　快速
　　　墜　　　　落

　　　我ｅ心肝不止仔疼

　　　－－2001.8.22寫置枋橋街
　　　　　2001.12.15《台灣ｅ文藝》第4期
　　　　　2003.2入選《台語詩新人選》