九月十九　半暝　咱七個人
　　　聚集置　夜市邊仔
　　　一間牛排館
　　　慶祝　同事一週年

　　　He是彼日烏來烘肉　轉來
　　　踮恁兜附近彼間
　　　麥當勞　開講　妳提出ｅ
　　　idea　我大聲喝讚
　　　閣卡願意　鬥相共　互代誌
　　　圓滿

　　　過程　雖然袂輸
　　　波浪　起起落落
　　　落尾總是　歡頭喜面
　　　親像彼暝　妳身軀穿ｅ
　　　彼領　粉紅仔色
　　　ｅ長褲　仝款

　　　誰知？　歡喜無一工
　　　妳ｅ心情　隨親像
　　　位摩天大樓　墜落
　　　塗跤兜　聽講
　　　妳受著誠大ｅ
　　　委屈　下班行過
　　　妳面頭前　關心
　　　妳無正面　回應

　　　第二工中晝　妳敲電話
　　　來我ｅ徛家厝
　　　一點一滴　講出
　　　妳ｅ心內事　雖然
　　　咱兩人　有講有笑
　　　嘸過　踮電話線彼頭
　　　我聽著　妳傷心
　　　暗暗目屎流　我嘛為妳
　　　心酸目眶紅

　　　妳講即暫仔　暫時
　　　無欲作陣　食宵夜
　　　我講妳是一個
　　　怪怪ｅ囡仔　妳遂顛倒
　　　起愛笑

　　　經過歸禮拜　即兩工仔
　　　妳假若　卡好笑神
　　　昨暗　妳講欲請我　食餅
　　　頭越過來　看著
　　　古錐ｅ頭毛夾仔

　　　其實　我知影　即擺
　　　妳正經　著重傷
　　　厚憂愁ｅ妳　心情有夠秋天
　　　我愛妳趕緊　展開
　　　足熟似ｅ　春天笑容

　　　－－2001.9.26寫置枋橋街
　　　　　2003.9《海翁台語文學》第21期