七月初四
　　　風颱欲來彼日暗頭仔
　　　妳將一張收銀組ｅ
　　　班表　拄予我
　　　彼陣
　　　我猶未下班
　　　半點鐘了後
　　　我拺一台貯滇物件ｅ
　　　菜籃仔車
　　　來到收銀台頭前
　　　揣無妳ｅ形影

　　　我摜兩大袋ｅ嘴食物
　　　行出店口
　　　看著妳置門口埕鬥顧
　　　水果擔
　　　我隨將兩袋物件
　　　囥落塗跤
　　　行偎佮妳相借問
　　　暗時夜市仔ｅ天頂
　　　當咧落毛毛仔雨
　　　厚風颱ｅ熱天暗暝
　　　妳用一向春天ｅ笑容
　　　對我

　　　彼暗
　　　我自安呢無轉厝
　　　置遐陪妳那稱水果
　　　那開講
　　　干單食兩塊三明治
　　　配一罐百香綠茶
　　　等妳下班

　　　尾手
　　　咱一行四人
　　　置難得清冷ｅ
　　　夜市仔店頭
　　　作伙食一碗三十ｅ
　　　麵線
　　　內面有妳已經兩個月
　　　嘸捌相借問ｅ　
　　　姊妹仔伴
　　　即擺宵夜
　　　無到十分鐘　煞場

　　　了後
　　　我陪妳行向
　　　燈火暗淡　人影稀微ｅ
　　　夜市巷仔口
　　　徛踮無成風颱暝ｅ
　　　路邊
　　　講心內事
　　　妳講妳誠關心
　　　我ｅ　終身大事
　　　害我一時　啞口無言　

　　　咱愈講愈投機
　　　愈無距離
　　　等妳將倒手舉起來
　　　面頭前
　　　看我送妳彼粒手錶仔
　　　ｅ時
　　　已經過點外鐘

　　　看妳瘦窕ｅ背影　漸　漸．．．
　　　消失置我ｅ目睭前
　　　對妳　只有加添一層ｅ
　　　疼惜　佮　　
　　　嘸甘

　　　－－2001.8.8寫置枋橋街
　　　　　2002.6《海翁台語文學》第9期