尋日著左對買左一年但係只著過兩.三次既鞋, 前晚我都已經唔記得左為咩我唔再著佢, 到尋日著既時候我卒之都記得我點解唔再點呢對該死既鞋既燈, 原因係.. 佢 kwat 到我隻腳好痛, 大大話話我都著左成3次啦.. 佢都仲係咁唔聽我話咁硬頸, 佢每次都唔識得點溫柔對我喎, 次次都搞到我紅晒, 起晒水泡佢先開心, 我唸我前世應該同鞋呢一樣野係有莫大既仇恨, 今世佢地對對都黎要我還債, 仲唔見血唔停手個隻.

我明明次次去買鞋我試個陣我都覺得好舒服喎, 但我唔明點解一番到屋企個陣對鞋就好似比人換左第二對咁, 成日都覺得唔係大左好多就細左好多, 再唔係就一著都已經 kwat 我腳, 買既鞋多, 放係度未著既一樣都咁多, 宜家我對新鞋好有恐懼感, 真係好驚佢整到我好痛, 因為每次 kwat 完腳之後就算你著番波鞋, 你隻腳都依然覺得好痛, 最慘係 summer 個陣著拖鞋又見到個腳踭紅晒勁難睇, 我真係好唔明好唔明, 點解帶埋隻腳去買鞋都會咁衰既… 唉..

有人叫我不如去造鞋, 好啦, 即管一試啦, 點知, 仲衰.. 一黎造既鞋都唔平, 二黎去試個陣同師傅講多幾次邊度唔舒服佢個樣就仲衰過我, 最終番到屋企又係多一對唔著既鞋係度, 唔開心既程度比出去買左對唔著既鞋仲要差, 因為造個陣滿心期待將會有一對又舒服又靚又唔 kwat 腳既鞋著, 點知.. 唉. 都係得個吉, 所以我好羨慕男仔呀, 佢地日日都著褲, 又唔駛著高踭鞋, 一年著死一對鞋直至爛先去買第二對都得, 而女仔就麻煩呀, 又高踭, 矮踭, 抽踭, 斗零踭等等咩都有.