麗美牽著阮的手   陳謙

阿母牽著阮的手

請警衛先生攄開

一扇大鐵門

予阮行入工場內

賣著竹籃內的俗麭

佮芳絳絳的牛奶

透早七點外

工人騎著歐兜邁（オートバイ）來上班

我佮阿母先定咧路邊喝聲：

橄欖麭，臭頭麭，鹹麭

閣有一台一台歐兜邁停落來交關

彼當時

阮猶未上幼稚園

陪阿母散步

予阿母牽手踅工場

猶原是歡喜的代誌

因為阮實在驚惶

暗時袂睏彼時

眠床枋下跤

蓋咧水搭頂的眠床

水塔內是毋是有蛇

定定規暗做這款惡夢

阿母牽著阮著手

阮著袂著驚

一間閣一間工場內做生理

中晝伊會換賣便當

有阮佮人客尚愛食的大塊滷排骨

食佮今仔日遮爾大箍白

幼稚園讀冊彼時，車若駛來門跤口

上車時阿母趕緊予我一塊虎頭麭佮牛奶

予我咧車內大喙大喙咬

上課老師毋知欲講啥

下課攏買小粒包仔沓沓仔食

爬甲門跤口的山路寬寬仔行

想著倒轉去猶原有阿母𤉙的綠豆湯

喙瀾就直直津

這攏是阮細漢阿母予阮的記持

一條番仔布，阮細漢的偝巾

恬恬掛咧衫仔櫥內趁日頭焱焱出來曝

予我想起著你，恁喝著麗美的阿母

⊙原載《笠》詩刊337期，2020年6月，頁 111