228一甲子的前兩工暗時
我佇房間內咧讀詩人江自得的《遙遠的悲哀》
坐佇客廳，已經十歲的孫仔
雄雄甲我講
阿伯！我們學校後天放假
我無意無意擱淡薄仔挑工
問伊：為什麼放假？
伊講：我不知道！
聽著安呢，我心內麻麻
我講：那是因為六十年前的228事件
國民黨殺了很多很多人
孫仔應我：有多少人？
擱講：國民黨他不是很偉大嗎？
我毋知影欲按怎應
親像血管卡真濟物件
無法度大聲唱歌

228一甲子的前一個禮拜
我做一個夢
夢見我真熟識的一片土地
土腳攏屍體
一個疊一個
逐個人的手中心攏貫鉛線　挹佇後尾
連死嘛真高貴的姿勢
我夢見阮媽媽為著欲保護我
甲我穿一領攏血跡的兵仔衫
這是我讀李筱峰教授的《解讀二二八》
的後一個禮拜所眠夢的
毋過規本冊我並無看了
因為我毋敢擱看落去

我知影
一甲子以前
有真濟囡仔會偷偷仔問怹媽媽
阮爸爸那會無張無持消失去？
國民黨敢毋是真偉大？
光復咱台灣
為啥物欲擱甲咱刣死？

2007年2月26日
刊載於第86期《海翁台語文學月刊》