2023-11-17 22:22:16Tong-îng Lîm
有人愛「改名」
有人愛「改名」
一，
我是拄著袂少人改名。若是下沿的改名拄著我，攏會先講「大的，我這馬改做這个名，以後請你叫這个名」。毋過，你嘛好心好行（hó-sim-hó-hīng）咧！是欲凌遲（lîng-tî）我hio̍h？就叫遐爾久矣，敢改會過？實在講，猶是叫伊的原名。
通常會改名，攏是講欲改運、重新出發。毋過，改一个名就會好運？這未免是對遐的每工無暝無日、認真拍拚的人傷無公平？人生，工課做會好袂好，是愛看你腹肚底有偌濟貨，佮會當發揮偌濟效果的。
曷若是親像頂一站仔，講改做紅鏈魚的名，食「紅鏈魚Su-si」就較俗！這佮寫這篇文的目的無關係，就省起來，莫了筆墨。
我是按呢想的，爸母共咱號的名，有濟濟爸母的心意、期待佮愛。名好名䆀攏只是記號。好好仔共寶惜，用你的「名聲」來回報爸母。我有一个老朋友，單名就叫做「乞（khit）」，無錯，就是乞食的乞。人嘛是平平順順過一生。
二，
個人的改名是「歡喜就好」，猶毋過，ga̋ng（共人）改名就是另外一層代誌。若是地名，公共的名就是影響著濟濟人的記憶，文化的底蒂佮文化的傳承。
自細漢到今，我生長的所在予人烏白改名，到今幾十年，跤就迒入棺柴一半矣，猶是袂當理解。
同時嘛有聽講我的母校：追分國小嘛愛改名。原因講「大肚鄉追分國民學校」。追分就會大肚（？），無好聽！這是啥貨？
好佳哉，到尾仔是無改（我是毋知啥原因）。
大肚溪頂的大橋，縱貫線（台一線）南王田過大肚溪到彰化國聖井的橋，較早日本時代就叫做「大肚橋」。後來起新橋，就毋是叫做大肚橋矣。人是共改做「大度橋」！我是毋知「度」就比「肚」較好聽？較文雅？
猶閣較譀的是共山線的火車頭「王田車頭」改做「成功車頭」（In是講「王田車站」「成功車站」）。
王田車頭是1905年5月15日就起的老車頭。「王田」閣是荷蘭統治時期的「王田制度」來的。閣是有幾若十年，去過「大專學生暑期集訓」的濟濟台灣查埔囝的記持。（人台東早就有一个叫做「成功」的鎮）。
到今猶是想袂曉的是：王田車頭」欲改做「成功嶺車頭」嘛小可仔有道理。改做「成功車頭」？？？敢是欲宣傳「追分-成功」？
毋過，我猶是認為「王田車頭」比「成功嶺車頭」較好聽。曷「成功車頭」閣較免講。
咱這个所在有濟濟有記持佮文化底蒂的地名，hőng（予人）凊彩就共改掉，閣改甲不答不七。咱 逐家會當對家己周邊的地名等，共斟酌看覓，共揣看覓，共揣轉來。
（2023.10.13 Tong-îng）