尋日返工又驚又喜…
上完中一之後,
有個學生送張 Christmas card 俾我,
o個下真係幾開心~

不過之後教完中三,
有兩個每次都會留耐d o既學生同我吹水,
為左保護佢地,
就叫佢地做 T & M 啦.
阿T好怪…
你永遠都唔會估到佢會同你講乜.
仲記得第二堂o既時候,
因為佢o係第一堂放學之後見到我幫老公仔買扭蛋,
佢就同我講,
“Miss, 你下次如果要買呢,
不如你同我講,
等我幫你買啦~
因為你唔識,
好易俾人呃架~~”…
o個次幾經辛苦先至說服到唔駛佢幫…

跟住上星期六,
佢地o岩o岩考完試,
知道左英文成績,
佢落左堂之後,
走出黎感激我教佢教得好好,
令到佢英文有進步, 仲學到好多野…
不過當我問佢有幾多分o既時間,
佢話有 106… 滿分係 200…..
我立即滴汗…仲心諗 “你平時都無乜聽書咋喎…. 就算真係有進步, 都應該唔關我事…”
鼓勵左佢幾句之後,
點知佢話 “我想同你握下手!”,
說時遲那時快,
佢隻手已經伸左出黎啦!~
無計….
我唯有以我充滿 “粉” o既手同佢握下… 跟住佢就走啦.

尋日 (11-12-2004),
佢放左學就問我o係邊度住…
我話元朗,
佢自言自語幾句之後,
就問我o係元朗邊度住….
當然係唔答啦~
推左幾推,
佢就話… “不如咁呀 Miss,
得閒呢一齊去行下街 shopping 呀~”
我o係心入面大叫左~!!!
點解會咁架…
咩事呀佢?!
咁都得?!!!!
真係吹脹.

唉~
呢個學生,
一次比一次嚇人.
真係好驚…

至於阿 M,
有機會至講…