我詩予你看──臺語文學的人與土地關懷

2013.11.03.林沈默老師專題演講引言

林沈默，本名林承謨，1959年出生佇斗六長安里西瓜寮庄跤，伊是華文、臺文作家，寫詩寫小說，伊文學的成佇2005年得著「雲林縣傑出作家獎」，是咱雲林的珍珠、寶貝。伊的臺語詩、囡仔詩量濟質好，閣較特別的，伊的詩作常在刊登佇中國時報、聯合報，自由時報、臺灣時報、自立晚報、臺灣日報、民眾日報的報紙副刊。閣有，伊費盡十年心血創作的全臺灣309個鄉鎮市地方唸謠史詩，攏是空前未有，是其他的臺文作家綴袂著的。

1981年沈默老師老師23歲，第一本華語詩集《白烏鴉》出版，冊來底按呢紹介家己：「本成，我是用爬的，用爬的家己佚陶，彼陣看著大人的腰身。四歲時，老母削一枝鋤頭柄予我，講：『予你行路！』這枝鋤頭柄一拄，就痀痀拄了20冬的路，當然我已經看著大人的規身軀。一年前，我到北投一間復健中心，神生共我做一跤鐵鞋，講：『做人，就應當好好徛起來！』自按呢我就共鋤頭柄抌掉，總算看著朗朗的天空。」後來這本詩集佇1986年得著全國優秀青年詩人獎。另外閣有得著台灣文藝獎、吳濁（音「毒」）流小說獎、中華文學敘述（音「士術」）詩獎等。

1987年沈默老師寫了第一首的臺語詩《跤踏雙臺船》，此後，就一心一意栽入臺語文學的創作，伊匟踮《沈默之聲》臺語詩集上頂頭的一首詩－用來做《沈默之聲》宣言，叫做〈臺灣新詩〉，咱來欣賞，就了解伊為按怎欲用母語臺語來寫詩。

臺灣新詩

寫詩寫到白頭鬃，纔知跪佇中國的地圖縫，無心假有意，毋捌裝內行，對黃河撇到彼條長江，對萬里長城牽到蘇州江南。槽（音「造」）來槽去，愈槽心愈虛。念來念去，愈念心愈茫。予阮阿母看著真毋甘，聽著念詩趕緊塞耳孔，青瞑牛看秀才講──喙笑目笑心袂動。

腳踏台灣地，頭戴台灣天。五千年歷史行軍，三十冬醉星夢月。

歲頭食到現此時，纔來認份家己是蕃薯囝，台灣人本底就行台灣路。原來過去硬寫攏是空、原來過去苦想若春夢、原來喙哺蓬萊米，手做中原大戇工。原來、原來──阮就是堂堂忘恩背祖，台灣文壇的大米蟲。

中原包袱攏總放，山崩地裂水流東。知影半世拍拚無採工，白紙烏字抌（tim3）紙籠，我纔會慼心關寒窗，吐盡心血來補償，詛咒重新來做人：我詛咒用故鄉的土地做稿紙，我詛咒用老母的話語做筆尾，我詛咒用人民的心情做墨膏，拚命寫出──台灣人掩崁的願望。

台灣代誌台灣味，台灣文學台灣語。新手新勢譜新詩，母仔喂──這回歌調無相仝，包妳聽了：喙笑目笑，心頭起地動。

1997年老爸過身，留一本破舊四常帶佇身邊的參考書《彚音寶鑑》（早期的臺語字典），，遺言交待伊「寧可無頭路，嘛愛為臺灣舖後路。」

有人講：沈默老師的囡仔詩若像五彩的煙火，現代詩若亂世的大砲，響亮新世紀新臺灣的天空，的詩攏是對國家的認同、臺灣前途命運、土地的疼痛、對庶（音「賜」）民的關懷。末學的感覺，伊的囡仔詩毋旦修辭媠，趣味鬥句、閣有深沉的啟示。伊是百分之百寫真，反應臺灣社會的某種真實面相，而且觀前顧後，時時刻不刻關心咱的土地、咱人佮環境，用心真深，用筆真利。

報紙媒體捌呵咾沈默老師是「臺語文學的新高山」，臺語童謠真出名的作家王金選老師講：「林沈默老師的臺語有五種感覺－深情感

、笑詼（幽默）感、使命感、現代感，開闊感。有五種氣味－詩味、韻味、趣味、所土味、心酸味。

沈默老師的囡仔詩佮臺灣念謠會當較緊出版，這是阮上大的向望 佮期待，伊的囡仔詩真濟無匟佇詩選詩集內兜，利用這個機會唸予逐家先鼻芳這是小菜，豐沛的饗宴連鞭來。

〈過橋搶〉

這隻羊、彼隻羌──

隻想先、細隻毋讓，

見面若寃仇，過橋相爭搶。

羌手提香、羊手提薑：

羌佮香──水底冒冒泅。

羊佮薑──水底咩咩咻。

〈白花益母草〉節錄

益母草！益母草！

摳一叢，湔一甌，

捧去阿娘眠床頭。

阿娘阿娘：

益母湯苦苦頭、甜甜後。

趁燒緊落喉，囝兒大漢會有孝。

〈金針花〉

金針金針，媠媠黃。

日來芳田園，暗到甜菜湯，

青春獻了，無人問。

金針金針，媠媠黃。

分一蕊，插值阮媽媽的──白頭毛。

好，好酒沉甕底，好詩才欲開始，咱以熱烈的拍噗仔聲來邀請咱雲林的珍珠－林沈默老師為咱分享「我詩予你看──臺語文學的人與土地關懷。」