朝早十點瞓醒, 即金像獎頒獎禮前三小時, 心血來潮重溫 <忘不了>。

人人都咁好戲所以唔再多提, 反而想講嘅係我覺得張柏芝前段做得好過後段。喊到失控、呆滯, 太好戲令我諗起佢同謝生分手時, 幾間傳媒大造『面部肌肉抽筋 柏芝失戀崩潰』嘅標題。



<忘不了> 同其他愛情片最大分別, 係好清楚咁提醒 / 解釋都市愛情嘅成份。我同你嘅愛情, 包括浪漫、同情、替代、現實以及更多更多; 平時唔提起, 應該係為咗殘忍、完全唔可愛嘅愛情留點餘地, 再輕輕加入鬼死咁小嘅羅曼蒂克, 務求引你入局。

每段愛情都總有浪漫成份, 但當細心一睇, 小慧 (張柏芝) 同大輝 (劉青雲) 嘅感情有好多缺憾而浪漫不足, 整體好唔完美 / 完滿 - 因為係一段真真實實有血有肉現在式愛情。反觀小慧同阿文 (古天樂) 嘅感情, 即使離過婚即使帶住個細路樂樂 (童島大地) , 依然好似每分每秒都甜蜜 - 因為人喺懷念嘅時候會選擇性地隔走一切不愉快, 小慧一樣, 所以當佢每次打去阿文嘅留言信箱, 諗起愈多幸福場面, 愈覺得今日難過。

分唔清楚到底係同情多 D 定愛多 D , 但當大輝有一車乘客時, 佢一樣唔可以走落車幫小巴爆肽嘅小慧。到片尾小慧聽大輝講完一大堆說話之後送上一句『你係一個好好嘅男人』, 咁到底最後嘅小慧同大輝嘅愛情, 係因為愛, 因為『你係好男人』, 因為感激, 定係因為賣小巴嘅一份默契一吓衝動?

<仙履奇緣> 入面葡提老祖認為愛唔需要理由, 但我覺得相反: 分分鐘可能係因為太多理由不能盡錄, 所以 <因為愛所以愛> 比較易消化。



忘不了係講『我一世都會記住』。
忘不了係講『我忘記咗架喇』。
講到底, 發生過應該忘不了。一街都係人, 到底有幾多人分得出今時今日身邊嘅另一半係全新嘅伴侶, 定係一個替代的傢伙?
或者愛真係唔洗理由。