女︰“爸爸，今晚講咩故事？”

爸︰“冇啊，好多都講過晒，諗唔到啦！不如妳隨口講兩樣物件，我就用佢地作個故仔。”

女略停，說︰“就講一個關於燈的故事啦！”

爸︰“好啊！比我諗一諗。”

(約十秒後)

      『這是一個關於燈膽同埋燈罩的故事。

         從前有一個鎢絲燈膽，即係用玻璃造，透明那種。他愛上與他日夕相對的燈罩。他被燈罩美麗的外形深深吸引著。

         有一日，鎢絲燈膽終於鼓起勇氣向燈罩說︰“燈罩小姐，我好愛妳，我可以帶比妳溫暖，妳嫁給我吧！”

         可惜燈罩小姐無情地說︰“妳咁大洗，多多電都唔夠你用啦；你個外形又老土，無內涵，被人一眼就睇穿晒，你仲成日曬到我好鬼死熱添啊。想我嫁比你，你慳d啦！”

       鎢絲燈膽十分沮喪，最後仲燒鬼埋。

第二日，燈罩小姐又再聽到一把熟悉的聲音，她低頭一看，見到一個蜷曲白髮的靚仔向佢放光。

白髮靚仔說︰“妳唔認得我啦！我昨日還向妳求婚呢！”

燈罩小姐驚訝地說︰“你 ... 你係鎢絲燈膽？”

白髮靚仔說︰“經妳昨天痛斥之後，我走左去整容，我已經唔係鎢絲燈膽啦，我依家係慳電膽啊！我同以前一樣咁光，但係就冇以前咁熱，唔會曬親妳！我成身白色，夠醒目，又唔怕被人一眼睇穿。而最重要係，我聽晒妳話，我唔止慳d，係慳好多啊！不如我地以後一齊生活啦，好嗎？”

燈罩小姐低頭不語，只是輕輕搖晃表示答應。

從此之後，燈罩就同慳電膽一齊過住幸福同環保生活啦！』

女︰“扯！無聊！”

爸哈哈大笑，自覺成功於睡覺前營造了輕鬆的氣氛，好讓女兒今晚發個好夢。