朋友來批講起失去e青春少年時代kap 花蓮迄片蔚藍e大海。

我想著少年時e 點點滴滴。
「時間」真是無情ma真是奧妙！

不知不覺當中，細漢幼稚無知e阮，1e 1e 步入人生中年e階段，有e男婚女嫁、有e猶原獨身1e，有e變作真有耐心e 父母，像矸轆a ti khang-khoe kap 尿chu a中1日1日經過，無時間懷想青春kap 曾經e 偉大美夢，有e 選擇過2 e人糖甘蜜甜e 生活，有e 抱獨身主義，有e 猶原teh 走chhoe 伊e Mr.Right 。
總是各人攏有家己e 理想，家己e 生活方式，家己e 人生。

無從比較，無需要比較，嘛免比較。擱卡免怨嘆、嫉妒、欣羨抑是驕傲。

逐e 人攏干單有1e 人生，每1種攏有鹹酸甜e 滋味，每1種e 滋味，攏m 是像外人所看著e 苦澀、甜蜜，真正e 氣味，干單家己知影。

花蓮e 大海聲聲teh 呼喚我。

我思念海。

Be 凍選擇腳底抹油1走了之，有責任愛盡。彼是大學生e 專利，迄陣e 講法是：研究人生e 智識無比享受人生擱卡重要。

1時間看be 著花蓮e 海。無！來去卡近e 金山看海嘛好！

1e 偷偷ka 家己放假 e 下晡，我來到金山看海。

初見海，be 輸看著真久無見面e 情人。
海是hiah 呢sui ！若無海墘刺目e 糞埽，我想會擱卡sui ！

我褪掉鞋a ，褪赤腳ti 海邊散步、走跳，我大聲喝咻，像天真活潑e gin-a 同款。

所有e 壓力，所有e 人、事、物，全部攏消失，天地間干單剩我kap 大海。

坐ti 金山e 海邊，看海湧隨風起舞，大浪小浪1湧擱1湧。

蘇軾e 詩浮出腦海，歷史e 千古風流人物，如今ti 叨位？世間e 種種目1下nih 若雲煙消散，有啥物通計較？

我變成1粒石頭a ，安安靜靜chhai ti 金山e 海岸，一直到日頭落山。