我上個禮拜六﹐日(七月十九﹐二十號)去完溫哥華島﹐一個好悶o既地方。除o左山水之外﹐就只有清新空氣。如果係渡假﹐充電o既話﹐o個度會係一個好o既選擇。因為我o個日真係訓得好好﹐攤落床同入睡幾乎係同一時間。如果想無拘無束﹐與世隔絕﹐全心全意咁休息﹐都可以諗諗溫哥華島。賣完廣告後﹐入返正題。響二十號當日﹐我同屋企人去o左觀鯨﹐起初我覺得觀鯨呢個活動絕對係side錢side時間。不過觀鯨後﹐我覺得絕對值回票價。因為觀鯨俾o左我一個好大o既啟示。當時我坐住橡皮艇﹐它以時速唔知幾多海里駛出海。我一邊望住浩瀚o既大海﹐突然有種從來未有過o既感觸。我面對住大海就諗到有個朋友對我講過o既一句說話﹕“海係一個好神秘o既地方﹐至今人類依然有好多未知o既領域。”面對住呢個咁神秘又奇妙o既地方﹐面對住呢個人類未完全征服o既領域﹐海底又黑又恐怖﹐我感到既不安又害怕﹐同時又有D興奮。當時我響度諗緊自己o既將來﹐因為事實上我都無乜點計劃過自己o既將來﹐船到橋頭自然直一直都係我o既信念。雖然單靠呢個信念我都活o左廿載﹐但事實上我o既未來的確同海底一樣﹐係一個未知o既地方。諗到呢點﹐的確令我感到不安同恐懼﹐同時又有D莫名的興奮。我諗原理同坐過山車一樣﹐有D人會越驚就越想坐﹐有D人就避之惻吉。我可以算係第一種﹐越有挑戰性o既活動﹐我就越感興趣。其實人係好化學﹐生命亦都非常短暫﹐短則三五七年﹐長則一百幾十年。開心同唔開心都係咁過日子﹐所以當然係揀D自己想做o既事去做啦。而我對o左個海兩個幾鐘之後﹐我突然好想征服呢個神秘o既地方。至於用咩o野方法征服﹐我到依家都未諗到﹐不過我暫時定下o既目標係擁有一艘屬于自己o既遊艇。隻遊艇唔需要太大﹐可以載到三五知己就已經夠。跟住可以每個禮拜出海已經係一件樂事﹐如果他日可以搵到海中o既某D秘密﹐人生就就更有意義。