我突然之間想起一位好奇怪的朋友。為了傳神，以下文字會用上廣東話。

佢叫﹖維莉，係我小學一至三年班最好既朋友。佢個樣幾得意，細細粒咁，好日本妹，不過就幾鍾意講大話，同打街霸。我唔明白，點解一個咁細既小朋友，竟然可以沉迷打機得咁緊要。佢真係好得意。佢好祟拜春麗，覺得春麗好勁，竟然可以成為萬綠叢中一點紅，有時仲可以打贏阿龍同軍佬。於是，有一日佢同我講：「喂，不如你以後叫我個花名--"春麗",啦。」我當然應承佢，因為我當時真係冇朋友，如果我唔應承佢，就會連春麗都冇埋。佢仲同我講：「其實春麗有好多姊妹架。前後15個。你就做我個家姐/細妹--"﹖麗",啦。」其實"﹖麗"個"﹖"係百搭架。所以大家可以諗下，一年有春夏秋冬，咁春麗至少有三個姊妹先。

之後我地就做埋筆友，每次佢回信都會畫好多個"﹖麗"同春麗俾我。佢可以每個"﹖麗"都同佢set個造型。例如"﹖麗"個髻0係左邊果陣，"﹗麗"個髻就會0係右邊。其實春麗個阿媽生咁多女，有冇可能得春麗一個紅先，佢個名又唔係特別好聽。所以我唔信架，不過我又唔打機既，又唔肯定喎，咪專登走去問果個同我同年既表哥黃偉傑，因為佢鍾意打gameboy同game gear，仲好鍾意睇漫畫、EXAM同A-club，幽遊白書美少女戰士R全套佢都有，陳瑋璘話佢係為左睇美少女變身先至買。我諗都可能係。講返正題，有一次我問佢春麗係咪有15個姊妹，佢話我痴左線。咁都好，証明我個想法冇錯。痴線果個原來係春麗。

仲有一次，春麗同我講，佢屋企有4隻貓6隻狗，仲成日打交。其實我真係唔信架，大佬呀，點信得落，佢住0係yiu yuk lam果幢樓架。我仲同佢講：「不如你唔好講大話啦。」佢梗係唔認啦，仲話我唔信佢。不過自從果次之後，我就冇再質疑過佢。不過就好想求証一下，佢當然唔肯俾我上去佢屋企。仲話D貓狗好惡，嚇親我就無謂。諗諗下，其實佢可能講緊真話。鄧博文屋企都可以有一犬二咪加魚和龜，佢只不過係誇張D 0者。

呢段充滿猜疑既友情，直到小學四年級我地分班果陣先至終結。我記得當時我最後一句同佢講既說話係：「你有冇睇美少女戰士既漫畫﹖」佢話有，跟住我就行開左。呢句我就一定信佢，佢咁鍾意女英雄，sailor moon就一定正中下懷，分分鐘仲會取代埋春麗既位置tim。花木蘭果D就唔得喇。

記得幾年前有人0係我面前提起佢，話佢改左個英文名，叫Saturn。不過D衣著就好日本囉。唔係好新潮果D喎，係杉菜style，好kawai果D。有時又會著下小鳳仙果D衫，仲束埋個髻，in a "cosplay" style。

無言。