9月6日 晴
這是開學的第二天,
和往常一樣地上了數堂後.
由於約了和我的仔女們組聚,
所以打算上完最後一堂便赴會.
可是在上堂途中收到一個沒顯示的電話號碼.
沒有調較靜音的我在堂上顯得一點尷尬,
因此沒有接聽.
在下課的時候,
電話又在響起.
---是那個"他"打來.
在緊張的心,顫抖的手下接通了這個電話.
"喂,甚麼事呢?"我強裝鎮定.
"呀..沒甚麼的,只是想知道你下午有堂上嘛?"他問我.
我心頭一陣陣的激動,難道"他"想約會我嗎?
"唔..是沒有的,有甚麼事嘛?"我的聲音盡量表現平常,保持點儀態.
"那麼..我手頭上有今天往迪士尼的門票,你有興趣一起去嗎?"他終於表態了.
迪士尼?那是很多少男少女心中想往的地方呢,重要的是能和"他"一起去嗎!?....
"好呀!有票當然去呢,不要浪費嘛."我肯定那刻的我已經不能掩飾心中的興奮了.
"好的,那麼我們一會在迪士尼站等吧!"他說.在那刻他也舒了一口氣吧!真可愛呢!

因此我就和我同房一齊去左迪士尼玩啦.
變態的少女日記告一段落.
原來香港個迪士尼真係同傳聞所言一般地細少,
不過由於昨天算係平日,都無遊戲需要排好耐隊.
個"明日世界"內只得三個遊戲,最好玩既"飛越太空山"都係好普通,
不過個場景都算幾靚.另外巴期光年個個遊戲都幾得意,竟然可以周圍同人鬥高分.
跟住我地就去左"探險世界"坐木筏去"泰山樹屋".呢個樹屋完全係個無聊既景點,無野玩之餘重一定要等坐木筏來回,不過就幾靚,因為係起係湖中間,夜晚個view好正.
跟住就睇左個show叫"獅子王慶典",用左fastpass所以唔使排好耐隊,入左個場好似人地睇馬戲團咁既,裏面表演既男女演員都好靚,尤其係班女獅子~~~呵呵呵~~~值得入場睇下~
跟住去坐快艇遊湖叫做"森林河流之旅",算係要排得耐既一個節目,不過先前有點寄望,因為小冊子寫明係刺激濕身咁,但係原來都係無事既.
咁就過埋淨返個個"幻想世界",同房話要玩旋轉木馬,之後就去左玩"小熊維尼歷險之旅",又係一個坐係部車上面兜圈既遊戲,不過內面個設計都幾童話幾靚,但係跳跳虎成日周圍彈出來都幾恐怖...之後把握時間睇埋套3D電影"米奇幻想曲",由於個時就快9點放煙花,o的人都去晒霸位睇所以套電影得十幾人睇.不過呢套野真係好睇喎,好多特效,噴水噴風就係例牌,最特別係唐老鴨捧個蘋果批出來時真係會噴埋蘋果批味喎~結尾時唐老鴨飛出來撞埋後面牆估唔到係有真野唔係3D野算係驚喜~
跟住出來已經係9點放煙花就衝返去城堡前面睇啦,不過個位唔算好,俾半面音響遮住個天..再者我又無叉好部相機o的電無得影低真係可惜...個城堡會有故事投射上去,o的煙花都算幾靚但就唔算壯觀~可能都關我睇個地點事既~
跟住散場就去左精品店買o的靚罐野食走~
因為時間緊迫,我地呢次都未試過食迪士尼既餐廳,不過咁貴無食都好既.
總結一句香港迪士尼真係好細,我地估計用5個小時就夠玩晒全部野啦.
我地去一陣都玩齊晒佢o的好野,唯一miss左睇唔到"米奇金奬音樂劇".
玩既野唔多,但係精品店真係有好多間..太貴太多買唔起呢...