客廳的紗門開關無啥順，橫直慣勢矣，就無去管。

兩禮拜前，感覺家己做代誌傷過拖沙，才拍電話予一間鐵門窗行；幾若年前阮有揣（tshuē，找）伊做過工課，算有信用。頭家來看鋁門窗，寸尺量量咧，講輪仔舊矣；毋過幾十年前的紗門，無零件通換，著規組改。玻璃門換強化玻璃，門框用米白色；軌道拆掉換新較厚工，閣會一四界塗沙。「這陣攏是用金屬包起來。」

聽起來有理，這个年代，真濟物件攏無舊零件，歹去就愛換新。玻璃門、紗窗替阮服務幾十年，換掉也算功成身退矣！頂個月拄好換新kha-tián（門帘）、米白色的門框和伊配起來應當真合。會當全面翻新，感覺真好。

心內估計可能愛十萬箍，結果兩日後，老板敲電話來，講六萬七。蹛（tuà，住）附近一位朋友最近開幾若百萬整理伊的厝，我開六萬七無過份，就決定「殘殘食一碗切仔麵」，共開落去。

共後生講，伊講毋是貴無貴的問題，「是傷拍損閣無環保，四扇玻璃門和通風窗猶好好！」

按呢講無毋著。好好的物件毋知會分解做別項用途，抑是單純當做糞埽擲掉？

想著有較討債，嘛毋甘，就按呢拜託一个做裝潢的序細鬥揣換紗門的師傅。

師傅來看，寸尺量好，講換兩片紗門，改輪仔，三千箍。

遮爾俗！

伊隨共兩片紗門拆落來，講兩點鐘後就會好。

原來伊的車就是工作室，親像不時聽著「換紗門、紗窗」彼種的作業方式。

結果三點外鐘師傅才轉來。我講拄才忽然間落西北雨，有影響著你做穡無？伊講有啊，雨有夠大，趕緊徙車去揣所在覕（bih ，躲）雨。

紗門鬥好，伊講門框愛小撨一下，用一个我毋知叫做啥物的家私去拍門框；足大聲，我坐佇客廳，伊拍一下，我就掣一下。

伊那做那唱歌，是一位快樂的師傅；我心內共伊加分。

所以提錢予伊的時，我講：「多謝你，遮四千。」

想袂到伊堅持收三千，講：「講偌濟就偌濟，哪會使加提！」

過後，後生佇電話中問我修理過的紗門有滿意無？我講雖然無100分，應當有80分。

我紲落去講：「若規組換，軌道包金框（khōng）銀，就100分。」

毋過，好好的物件無拍損，會使加20分。

2026/9/17《人間福報》副刋