後生講電視頂彼種狗會食大型動物食賰的獵物；我講hyena。伊問我哪會知影這个字。我講看過一齣法律劇，劇名就號做《Hyena：富豪辯護人》。

閣較早以前看過湯姆漢克的電影《西雅圖夜未眠》，內面查埔囡仔討厭爸爸約會的對象，講伊的笑聲和hyena的叫聲仝款！

過後去影劇平台拍關鍵字「湯姆漢克」，竟然有1993年的《西雅圖夜未眠》。想欲確認家己的記持，就閣共看一遍。

單親爸爸的山姆（湯姆漢克飾）去和人約會，山姆拄仔予八歲後生拍去餐廳的電話煩著，問彼位女子有囡仔無？無。山姆講：「我的送你好無？」伊就笑甲真脫線。後來佇厝內約會，伊自頭笑到尾。伊的表情和笑聲確實有成hyena！

我和一位針灸醫生有緣，講話投機。伊講讀大學的時是劍道社社長。哇，女學生比劍，有夠奅（phānn，帥氣）！我建議伊看韓劇《25，21》，劇中金泰梨演的是一名擊劍國手。醫生講：「彼是西洋劍，我練的是東洋劍。」我講按呢就是日劇《浪漫匿名者》中，小栗旬健身運動彼種劍道。

伊講大學時飼過針猬（tsiam-uī， 刺猬），甚至飼伊食的麵包蟲！我講我熟似針猬是佇《起痟矣，因為你》劇中。畫家金宣虎和借蹛（tuà，住）幾工的女性好朋友啉醉了後無小心上床，關係變甲真礙虐（gāi-gio̍h，尷尬）。女性朋友離開的時袂記得紮伊飼的針猬。畫家予針猬一間柴厝仔，和伊「相依為命」。一年了後，女性朋友閣再出現，畫家雙手共針猬捧到胸前，講免痟想欲來共提轉去……

最近閣有外星人佇地球存在的報導，講美國政府祕密記錄的至少有4種外星物種，包括一種號做「北歐人」（Nordics）的外星混種人，in有淺色的頭鬃和皮膚；講關係外星人活動的報告攏有送到美國總統的辦公桌，川普真瞭解外星人和in來地球的目的等等……

這予我想著一齣趣味的日劇《小鎮星熱點》。

旅館櫃台職員一日騎鐵馬下班的路途當中，予一台大貨車挵（撞）飛起來，無疑悟伊的同事高橋先生忽然間出現，共伊人佮鐵馬夯（giâ ，扛）起來，救著伊的性命！

高橋先生閣是好鼻獅，客房內的電視機予人偷提去，伊一路鼻，就發見電視機藏佇清潔員的車內。……

有種種特殊能力，因為伊是外星人！是外星爸爸和地球人媽媽生的混種。

毋過，他發功以後會有發燒、流鼻水、規身軀痠疼的副作用；強力用腦過後會落頭毛！

好佳哉有修補的方法：浸溫泉。

按呢講起來，咱身軀邊凡勢嘛有外星人？無代無誌發燒、流鼻水、規身軀痠疼，抑是特別會落頭毛、不時愛去浸溫泉的人攏有可能；in無一定是有淺色頭鬃和皮膚，嘛有可能像高橋先生彼種烏頭毛黃皮膚的oo-jí-sáng（歐吉桑）。

忽然間，感覺我熟似的人有幾偌个有嫌疑。

《人間福報》副刋2026/8/1